މިއަހަރުގެ ޤައުމީ ދުވަސް ފާހަގަކުރުމަށް ބާއްވާ ޖަލްސާތައް މާލެއާއި ހއ. އުތީމުގައި އޮންނާނެކަން ދިވެހިބަހާއި ސަގާފަތާއި ތަރިކައާބެހޭ ވުޒާރާއިން ހާމަކޮށްފިއެވެ. އެގޮތުން ގައުމީ ދުވަހުގެ ރަސްމީ ޖަލްސާ އޮންނާނީ މާލޭގައި ކަމަށާއި، ކުރީގެ އަހަރުތަކެކޭ އެއްފަދައިން އުތީމުގައިވެސް ޚާއްޞަ ޖަލްސާއެއް ބޭއްވޭނެކަމަށް އެ ވުޒާރާއިން ހާމަކޮށްފައި ވެއެވެ.
އޭގެ އިތުރުން މި އަހަރުގެ ޤައުމީ ދުވަހުގެ ފާހަގަކުރުމުގެ ގޮތުން، ށ. އަތޮޅު ކައުންސިލުން އިސްނަގައިގެން ށ. މާއުނގޫދޫގައިވެސް ޚާއްޞަ ހަރަކާތްތަކެއް ކުރިއަށްދާނެ ކަމަށް ދިވެހިބަހާބެހޭ ވުޒާރާއިން ހާމަކުރައްވާފައިވެއެވެ. މާއުނގޫދޫގައި ޚާއްޞަ ޖަލްސާއެއްގެ އިތުރުން ސަގާފީ ކުޅިވަރުތަކާއި ދިވެހި ކެއުންތައް ހިމެނޭ ޖާފަތެއް ބޭއްވުމަށް ވަނީ ހަމަޖެހިފައެވެ. މި ހަރަކާތްތަކުގައި ދިވެހިބަހުގެ ވަޒީރު އާދަމް ނަޞީރު އިބްރާހިމް ބައިވެރިވެވަޑައިގަންނަވާނެ ކަމަށްވެސް ބަޔާންކުރައްވާފައިވެއެވެ.
ޤައުމީ ދުވަހަކީ ރަބީޢުލްއައްވަލްމަހުގެ 1 ވަނަ ދުވަސް ކަމަށްވާއިރު، މިއަހަރު މި ދުވަސް ފާހަގަކުރެވޭނީ ސެޕްޓެމްބަރު މަހުގެ 4 ވަނަ ދުވަހުއެވެ. މި ދުވަސް ފާހަގަކުރަނީ 1573 ވަނަ އަހަރު އައްސުލްޠާން އަލްޣާޒީ މުޙައްމަދު ތަކުރުފާނު އަލްއަޢުޡަމާއި އިތުރު 5 ބޭކަލަކު އިސްވެ ހިންގެވި ޖިހާދީ މަސައްކަތުގެ ސަބަބުން ޕޯޗުގީޒުންގެ އަޅުވެތިކަމުން ރާއްޖެ މިނިވަންވި ދުވަހުގެ ހަނދާނުގައެވެ.
