ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރުގެ މަޤާމަށް ގ.ދިލްކަޝް މުޙައްމަދު ސަޢީދު އައްޔަންކޮށްފިއެވެ. އިތުބާރުހިފޭ މަސްދަރުތަކުން އެ މައުލޫމާތުވަނީ "ޚަބަރު އޮންލައިން"އަށް ކަށަވަރު ވެފައެވެ.
ޕީއެސްއެމްގެ ހިއުމަން ރިސޯސް ޑިޕާޓްމަންޓުން މުވައްޒަފުންނަށް ފޮނުވި މެސެޖެއްގައި ބުނެފައިވަނީ، މުޙައްމަދު ސަޢީދު ކުންފުނީގެ ޑިރެކްޓަރުންގެ ބޯޑުގެ މެންބަރުކަމާއި މެނޭޖިންގ ޑިރެކްޓަރުގެ މަޤާމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން (ޕީސީބީ) އައްޔަނުކޮށްފައިވާ ކަމަށެވެ.
މުޙައްމަދު ސަޢީދަކީ ކުރިން ދައުލަތުގެ އެކި މަޤާމުތައް ފުރުއްވާފައިވާ ބޭފުޅެކެވެ. އޭނާ އެޑިއުކޭޝަން މިނިސްޓްރީގައި ޑިރެކްޓަރ ޖެނެރަލްކަމާއި ޕަރމަނަންޓް ސެކްރެޓަރީކަން ކުރައްވާފައިވެއެވެ. އަދި އިނގިރޭސިވިލާތުގެ ޔުނިވަރސިޓީ އޮފް ބޯލްޓަންއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ ހާސިލުކުރައްވާފައިވެއެވެ.
ޕީއެސްއެމްގެ މެނޭޖިންގ ޑިރެކްޓަރުގެ މަޤާމަށް ސަޢީދު ހަމަޖެއްސެވީ، މިހާތަނަށް އެ މަޤާމުގައި ހުންނެވި ޒީނާ ޒާހިރު އިސްތިޢުފާ ދެއްވުމާ ގުޅިގެންނެވެ. ނަމަވެސް ޒީނާ މަޤާމުން އިސްތިޢުފާ ދެއްވި ސަބަބު އަދި ހާމަކޮށްފައެއް ނުވެއެވެ.
