ނިމިދިޔަ އެމްޑީޕީ ސަރުކާރުން ތަޢާރަފުކުރި ބިންވެރިޔާ އަދި ގެދޮރުވެރިޔާ ސްކީމުގެ ދަށުން ދޫކުރަން ނިންމާފައިވާ ގޯތިތަކާއި ފްލެޓުތައް ހަވާލުކުރުން ލަސްވަމުންދާތީ ބައެއް ރައްޔިތުން ރޭވެސް އިހުތިޖާޖުކޮށްފިއެވެ.
ފަހަކަށް އައިސް ކޮންމެ ސިލްސިލާކޮށް ބާއްވަމުންދާ މުޒާހުރާތަކުގެ ތެރެއިން، ރޭ ރާޅުގަނޑު ސަރަހައްދުގައި ބޭއްވި މި އިހުތިޖާޖުގައި ބައިވެރިން ވަނީ އެއް ސަރުކާރުން ރައްޔިތުންނަށް ދީފައިވާ އަސާސީ ހައްގުތަކަށް އަނެއް ސަރުކާރުން އަރައިނުގަތުމަށާއި، ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް ގޯތިތަކާއި ފްލެޓުތައް ހަވާލުކުރުމަށާއި، ގޯތި ދޫކުރުމަށް ހިއްކަން ފަށާފައިވާ ސަރަހައްދުތައް އަވަހަށް ނިންމުމަށް ގޮވާލާފައެވެ.
ބިންވެރިޔާ ސްކީމުގެ ދަށުން 18,955 މީހުން ގޯއްޗަށް ޝަރުތު ހަމަވާއިރު، ޖުމުލަ 9,003 ގޯތި ދޫކުރަން ނިންމާފައިވެއެވެ. މީގެ ތެރޭގައި ހުޅުމާލެއިން 1,351 ގޯއްޗާއި، ގުޅީފަޅުން 2,219 ގޯއްޗާއި، ގިރާވަރު ފަޅުން 5,433 ގޯތި ހިމެނެއެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގައި 4,000 ފްލެޓް ތަރައްގީކުރަމުންދާއިރު، ފްލެޓަށް ޝަރުތުހަމަވާ މީހުންގެ ލިސްޓުގައި މައްސަލައެއް އުޅޭ ކަމަށް ބުނެ އޭސީސީން ވަނީ ތަހުގީގުކޮށްފައެވެ. ނަމަވެސް ހައުސިންގ މިނިސްޓްރީން ބުނެފައިވަނީ އޮކްޓޯބަރުގައި ފްލެޓުތައް ދެވޭނެ ކަމަށެވެ.
އެހެންނަމަވެސް، ސަރުކާރު ކޯލިޝަންގެ މެންބަރެއް ކަމުގައިވާ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެފައިވަނީ ފަޅުން ގޯތި ދިނުމުގެ ގާނޫނީ ހަމައެއް ނެތް ކަމަށާއި، އެފަދަ ގޯތިތައް އަތުލަންޖެހޭނެ ކަމަށެވެ. މިކަމާ ގުޅިގެން ބައެއް ފަރާތްތަކުން ވަނީ ސަރުކާރުން ފްލެޓު ލިސްޓު ބާޠިލުކުރަނީ ކަމަށް ބުނެ ކަންބޮޑުވުން ފާޅުކޮށްފައެވެ.
