ލާމަރުކަޒީ ނިޒާމަށް ކުރިމަތިވަމުންދާ އެކި ގޮންޖެހުންތަކާމެދު ދިވެހި ޑިމޮކްރެޓިކް ޕާޓީ (އެމްޑީޕީ) އިން ކަންބޮޑުވުން ފާޅުކޮށްފިއެވެ. ފާސްކުރެވުނު ބިނާވެށި ޕްލޭންކުރުމާއި ހިންގުމުގެ ގާނޫނާއި ގުޅޭގޮތުން ކަންބޮޑުވުން ފާޅުކޮށ، އަދި ކައުންސިލް އިދާރާތަކަށް ސިޔާސީ މުވައްޒަފުން އައްޔަންކުރުން ހުއްޓާލުމަށް ގޮވާލާ އެމްޑީޕީން ނެރުނު ބަޔާނެއްގައި، 20 ވަނަ ރައްޔިތުންގެ މަޖިލީހުން ފާސްކުރަމުންދާ ބައެއް ގާނޫނުތަކުގެ ސަބަބުން ލާމަރުކަޒީ ނިޒާމު ފުރިހަމަ ގޮތުގައި ތަންފީޒުކުރުމަށް ހުރަސްތަކެއް ކުރިމަތިވާނެކަމަށް ފާހަގަކޮށްފައިވެއެވެ.
ޚާއްޞަކޮށް، ފާސްކުރެވުނު ބިނާވެށި ޕްލޭންކުރުމާއި ހިންގުމުގެ ގާނޫނުގެ ސަބަބުން ރަށްރަށުގެ ބިން ޕްލޭންކޮށް ބޭނުންކުރުމުގައި ރައްޔިތުންގެ ބައިވެރިވުމެއް ނެތި މަރުކަޒީ އިދާރާތަކަށް ފުރިހަމަ ބާރު ލިބިގެންދާނެކަން އެމްޑީޕީން ފާހަގަކޮށްފައިވެއެވެ. މީގެ އިތުރުން، މިހާރު ކޮމިޓީ މަރުހަލާގައިވާ އާބަން ޑިވެލޮޕްމަންޓް ބިލު މިހާރު އޮތްގޮތަށް ފާސްވެއްޖެނަމަ، ގާނޫނުއަސާސީއާއި ގާނޫނުތަކުގައި ކަނޑައެޅިފައިވާ ލާމަރުކަޒީ އުސޫލުތައް މުގުރާލެވިދާނެކަމަށް ޕާޓީން ބިރުފާޅުކޮށްފައިވެއެވެ.
މި ކަންބޮޑުވުންތަކާ ގުޅިގެން، އެމްޑީޕީން ވަނީ ސަރުކާރަށާއި ރައްޔިތުންގެ މަޖިލީހަށް ބައެއް ކަންކަމަށް ގޮވާލާފައެވެ. އޭގެތެރޭގައި ހިމެނޭ ބައެއް ކަންކަމަކީ:
1. ލާމަރުކަޒީ ގާނޫނު ތަންފީޒުކުރުމަށް ހުރަސްއެޅިދާނެ ގާނޫނުތަކާމެދު ރަށު، ސިޓީ އަދި އަތޮޅު ކައުންސިލްތަކާއި، މަދަނީ ޖަމްޢިއްޔާތަކާއި، ސިޔާސީ ޕާޓީތަކާއެކު ހުޅުވާލެވިގެންވާ މަޝްވަރާއަކަށް ދިއުމަށް.
2. އެފަދަ މަޝްވަރާތަކަކާ ނުލައި މިފަދަ ބިލުތައް ފާސްނުކުރުމަށް ރައްޔިތުންގެ މަޖިލީހަށް އިލްތިމާސްކުރުން.
3. ކައުންސިލް އިދާރާތަކަށް ސިޔާސީ މުވައްޒަފުން އައްޔަންކުރުން ހުއްޓާލުމަށް ރައީސް ޑރ. މުޙައްމަދު މުޢިއްޒަށް ގޮވާލުން.
އެމްޑީޕީން މި ބަޔާނުގައި ފާހަގަކޮށްފައިވާ ގޮތުގައި، 2010 ވަނަ އަހަރު ފާސްކުރެވުނު ލާމަރުކަޒީ ގާނޫނަކީ ރާއްޖޭގެ އިދާރީ ހިންގުން ލާމަރުކަޒުކޮށް، ރަށްރަށުގެ ތަރައްޤީގައި ރައްޔިތުންގެ ބައިވެރިވުން ހޯދުމަށް ވަރަށް މުހިންމު ގާނޫނެކެވެ. އަދި 2018 ވަނަ އަހަރު އުފެދުނު އެމްޑީޕީގެ ދެވަނަ ސަރުކާރުން މި ގާނޫނަށް ގެނައި އިޞްލާޙުތަކުން ކައުންސިލްތަކުގެ މާލީ އަދި އިދާރީ މިނިވަންކަން އިތުރުވެގެން ދިޔަކަމަށްވެސް ޕާޓީން ފާހަގަކޮށްފައިވެއެވެ.
