ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ އާބަން ޑިވެލޮޕްމަންޓް ބިލާ ގުޅިގެން ޑިމޮކްރެޓްސް ޕާޓީން ކަންބޮޑުވުން ފާޅުކޮށްފިއެވެ.
އެ ޕާޓީން ނެރުނު ބަޔާނުގައި ފާހަގަކޮށްފައިވަނީ މި ބިލުގެ ސަބަބުން އާބަން ސަރަހައްދުތައް ޕްލޭންކުރުމާއި ތަރައްޤީކުރުމުގައި ލޯކަލް ކައުންސިލްތަކުގެ ދައުރު އެކަށީގެންވާ ވަރަށް ނެތްކަމެވެ. އަދި މި ބިލު މިހާރު އޮތްގޮތަށް ފާސްވެއްޖެނަމަ، ޤާނޫނުއަސާސީން ކަށަވަރުކޮށްދޭ ލާމަރުކަޒީ އުސޫލުން އިދާރީ ދާއިރާތައް ހިންގުމުގެ ނިޒާމު އާބަން ސެންޓަރުތަކުގައި ގެއްލިގެން ދިއުމުގެ ބިރު އޮތްކަމަށް ބުނެފައިވެއެވެ.
ޚާއްޞަކޮށް ބިލުގެ 10 ވަނަ މާއްދާ އޮތްގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލާމަރުކަޒީ ނިޒާމު ހަރުދަނާކުރުމަށް ދެއްވާފައިވާ ވަޢުދުތަކާ ފުށުއަރާކަމަށް ޕާޓީން ދެކޭކަން ފާހަގަކޮށްފައިވެއެވެ. މީގެއިތުރުން، ގުޅީފަޅު، ގިރާވަރުފަޅު އަދި ފުށިދިއްގަރުފަޅު ފަދަ އާބަން ސެންޓަރުތައް ތަރައްޤީކުރުމުގައި ހުޅުމާލެ ތަރައްޤީކުރި ގޮތާ ޚިލާފަށް، ޤާނޫނުއަސާސީގައި ބަޔާންކުރާ ލާމަރުކަޒީ އުސޫލުން ކުރިއަށް ގެންދިއުމަށް ޕާޓީން ބާރުއަޅާކަން ބަޔާނުގައި ފާހަގަކޮށްފައިވެއެވެ.
ޑިމޮކްރެޓިކް ޕާޓީން ދެކޭގޮތުގައި ލާމަރުކަޒީ ނިޒާމުގެ ބޭރުން، ޑިމޮކްރެޓިކް ކޮންޓްރޯލް ނެތި ހޯދޭ އާބަން ތަރައްޤީއަކުން ނަތީޖާ ނުނިކުންނާނެއެވެ. އެހެންކަމުން، ލާމަރުކަޒީ ނިޒާމަށް ހުރަސްއެޅޭ ގޮތަށް އަދި ލޯކަލް ކައުންސިލްތަކުގެ ބާރު ގެއްލޭ ގޮތަށް ބިލުގައި ހުރި ކަންކަން ބަދަލުކުރުމަށް ގޮވާލާފައިވެއެވެ. އަދި މި ބިލާ ގުޅޭގޮތުން ފުޅާ ދާއިރާއެއްގައި، ކައުންސިލްތައް ހިމެނޭ ގޮތަށް މަޝްވަރާކުރުމަށާއި، ކައުންސިލްތަކުގެ ބާރު ކަނޑުވާލާ ފަދަ ގޮތަކަށް ބިލުގައި މިހާރު ހުރި ކަންކަން އިޞްލާޙުކުރުމަށް ޑިމޮކްރެޓިކް ޕާޓީން ވަނީ ގޮވާލާފައެވެ.
