އިންޑިއާގެ ބޮޑުވަޒީރު ނަރެންދުރަ މޯދީ ޔޫކުރެއިންއަށް ވަޑައިގެންފިއެވެ. މޯދީ ޔުކްރެއިންގެ ވެރިރަށް ކީވްއަށް މަރުޙަބާ ކިޔައިދެއްވީ ރައީސް ވޮލޮޑިމިރް ޒެލެންސްކީއެވެ. މިއީ ޔުކްރެއިން 1991 ގައި ސޯވިއެޓް ޔޫނިއަނުން މިނިވަންވުމަށްފަހު އިންޑިޔާގެ ބޮޑުވަޒީރަކު ޔުކްރެއިނަށް ކުރި ފުރަތަމަ ޒިޔާރަތެވެ.
ހުކުރު ދުވަހު މަރިންސްކީ ރިޔާސީ ގަނޑުވަރުގައި މަޝްވަރާތައް ފެށުމުގެ ކުރިން ޒެލެންސްކީވަނީ މޯދީއަށް މަރުހަބާ ވިދާޅުވެފައެވެ. އަދި އިންޑިޔާގެ ލީޑަރުގެ މި ޒިޔާރަތަކީ "ވަރަށް ރައްޓެހި" އަދި "ތާރީޚީ" ޒިޔާރަތެއް ކަމުގައި ވިދާޅުވިއެވެ. މި ޒިޔާރަތުގައި އިންޑިޔާގެ ބޮޑުވަޒީރު އިޤްތިޞާދީ ގުޅުންތަކާއި، ދިފާޢީ، ސައިންސާއި ޓެކްނޮލޮޖީގެ ދާއިރާއިން އެއްބާރުލުން ދިނުމާ ބެހޭ ގޮތުން މަޝްވަރާކުރައްވާނެއެވެ. އަދި މީގެ އިތުރުން ރަޝިޔާއާއެކު ހިނގަމުންދާ ހަނގުރާމަ ނިންމާލުމަށް ހައްލެއް ހޯދުމާ ބެހޭ ގޮތުން ވެސް މަޝްވަރާކުރައްވާނެއެވެ.
މި ބައްދަލުވުން ފެށުނީ ދެ ލީޑަރުން ހަނގުރާމައިގައި މަރުވެފައިވާ އެތައް ސަތޭކަ ޔުކްރެއިން މީހުންގެ ހަނދާނީ މަރުކަޒަކަށް ޒިޔާރަތްކުރެއްވުމާއެކުއެވެ. މި ހަނގުރާމަ ފެށިތާ ދެ އަހަރަށްވުރެ ގިނަ ދުވަސްވެއްޖެއެވެ.
ޔުކްރެއިންގެ ރައީސް އެކްސް (ޓްވިޓަރ) ގައި ވިދާޅުވެފައިވަނީ އޭނާއާއި މޯދީ "ރަޝިޔާގެ އަނިޔާވެރިކަމުގެ ސަބަބުން ފުރާނަ ގެއްލުނު ކުޑަކުދިންގެ ހަނދާން އާކޮށްފައިވާ" ކަމަށެވެ.
މޯދީ ޒެލެންސްކީއަށް ވިދާޅުވެފައިވަނީ ހަނގުރާމައިގައި ކުޑަކުދިން މެރުމަކީ ޤަބޫލުކުރެވޭނެ ކަމެއް ނޫން ކަމުގައެވެ. އަދި އޭނާ ޔުކްރެއިނަށް ވަޑައިގެންފައިވަނީ ސުލްޙައިގެ މެސެޖަކާ އެކުގައި ކަމަށް ވިދާޅުވިއެވެ.
