ކާބޯތަކެތީގެ ރައްކާތެރިކަމާބެހޭ ގާނޫނު މާދަމާ ތަންފީޒު ކުރަން ފެށުމުން، ހަރުދަނާ އުސޫލެއްގެ ދަށުން ކާބޯތަކެތި ވިއްކާ ތަންތަން ބަލައިފާސްކޮށް އެތަންތަން ހުނަނަން ޖެހޭ މިންގަޑުތައް ގެނެވޭނެ ކަމުގައި ހެލްތު މިނިސްޓަރ ޑރ. އަބުދުﷲ ޚަލީލު ވިދާޅުވެއްޖެއެވެ.
ހެލްތު މިނިސްޓަރު ޑރ. ޢަބްދުﷲ ޚަލީލް މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ ރައްޔިތުންގެ ރައްކާތެރިކަން ކަށަވަރުކުރުމުގައި އެއްވެސް ކަމެއްގައި ފަހަތަށް ނުޖެހޭނެ ކަމަށާއި، އެކަން ކުރުމުގައި އެކަށިގެން ނުވާ ފެންފަރުގައި ކާބޯތަކެތި އުފައްދާ ބޭރު މީހުން ކަމާ ގުޅުންހުރި މުވައްސަސާތަކަށް ރިޕޯޓު ކޮށްގެން ޑީޕޯޓު ކުރަންޖެހިއްޖެ ހާލަތެއްގައި އެކަންވެސް ކުރާނެ ކަމުގައެވެ.
މިއަދުގެ ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، 23 އޮގަސްޓުން ފެށިގެން ކާބޯތަކެތީގެ ރައްކާތެރިކަމާ ބެހޭ ޤާނޫނު ތަންފީޒުކުރަން ފެށުމާއެކު، ކާބޯތަކެތި ވިއްކާ ތަންތަން ބަލައި ފާސްކޮށް، އެތަންތަން ހުންނަންޖެހޭ މިންގަނޑުތަކަށް ގެނެވޭނެ ކަމުގައެވެ، އެގޮތުން ކާނާގެ ރައްކާތެރިކަން ކަށަވަރުކުރުމަށްޓަކައި، ޤާނޫނާ ޚިލާފުވާ ބިދޭސީން ޑިޕޯޓްކުރުމާ ހަމައަށް ދިއުމަށް ވެސް ތައްޔާރަށް ތިބިކަމަށް މިނިސްޓަރ ވިދާޅުވިއެވެ.
ރައްކާތެރިކަން ކަށަވަރު ކުރުމަށްވޓަކައި އަޅުގަނޑުމެން ފަހަކަށް ނުޖެހޭނަން، ރައްޔިތުންގެ ކާނާގެ ރައްކާތެރިކަން ކަށަވަރު ކުރުމަށް ޓަކައި އެ އުފައްދާ މީހަކީ ރާއްޖެއިން ބޭރު މީހެއް ނަމަ ޑީޕޯޓް ކުރަން ޖެހިއްޖެއްޔާ އެކަން ވެސް ކަމާބެހޭ އިދާރާތަކަށް ފޮނުވާ އެ މީހަކާއި ދޭތެރޭ އަޅުގަނޑުމެން ފިޔަވަޅު އަޅާނަން.
ޑރ. ހަލީލު ވިދާޅުވިއެވެ.
އަލަށް ތަންފީޒުކުރާ ގާނޫނުގެ ދަށުން، އެމްއެފްޑީއޭއިން ގަބޫލުކުރާ މިންގަނޑުތަކަށް ނުފެތޭ ތަންތަން ބަންދުކުރުމާއި، ހާލަތު ރަނގަޅުކުރުމަށްފަހު އަލުން ހުޅުވުމުގެ ބާރު އެމްއެފްޑީއޭއަށް ލިބިގެންވާ ކަމަށް ވަޒީރު ވިދާޅުވިއެވެ. އަދި މި ޤާނޫނާ އެކު، ކާބޯތަކެތި ލޭބަލްކުރުން ލާޒިމުވެގެންދާނެ ކަމަށާއި، މިކަމުން ޒިންމާ ކުރުވަންޖެހޭ ފަރާތް ފަސޭހައިން ހޯދޭނެ ކަމަށް ވެސް ވިދާޅުވިއެވެ.
ވަޒީރު ވިދާޅުވީ، ޤާނޫނުގައި 10,000 ރުފިޔާއިން ފެށިގެން 1,000,000 ރުފިޔާއާ ހަމައަށް ޖޫރިމަނާކުރެވޭނެ ކަމަށެވެ. އަދި ކާބޯތަކެތީގެ މައްސަލަތައް ފަސޭހައިން ރިޕޯޓުކުރެވޭނެ ގޮތްތަކެއް ހަމަޖައްސާނެ ކަމަށާއި، ވަޓްސްއެޕް އަދި ވައިބަރ މެދުވެރިކޮށް ވެސް ފޮޓޯއާއެކު ރިޕޯޓުކުރެވޭނެ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ރައްޔިތުންގެ ޞިއްޙީ ރައްކާތެރިކަމަކީ ސަރުކާރުން ވަރަށް ބޮޑު އިސްކަމެއް ދޭ ކަމެއް ކަމަށެވެ.
