މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސަބްސިޑިއަރީ ކުންފުންޏެއް ކަމަށްވާ އައިލެންޑް އޭވިއޭޝަން ސާވިސަސްގެ ޑިރެކްޓަރުންގެ ބޯޑުގެ ޗެއަރޕާސަންގެ މަޤާމުން މުޙައްމަދު މިހާދު ވަކިކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިއަދު ހާމަކުރި ގޮތުގައި، މިހާދު އެ މަޤާމުން ވަކިކޮށްފައިވަނީ މިއަދުން ފެށިގެންނެވެ. އެހެންނަމަވެސް، މި ވަކިކުރުމުގެ ސަބަބު އަދި ހާމަކޮށްފައެއް ނުވެއެވެ.
މިހާދަކީ މީގެ ކުރިން އައިލެންޑް އޭވިއޭޝަން ސާވިސަސްގެ މެނޭޖިންގ ޑިރެކްޓަރުކަން ވެސް ކުރައްވާފައިވާ ބޭފުޅެކެވެ. މީގެ އިތުރުން، އޭނާ ވަނީ އެމްއޭސީއެލްގެ ބޯޑު ޑިރެކްޓަރުކަމާއި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ މެނޭޖިންގ ޑިރެކްޓަރުކަން ވެސް ކުރައްވާފައެވެ.
މިހާދު އައިލެންޑް އޭވިއޭޝަން ސާވިސަސްގެ ޗެއަރމަންކަމަށް އައްޔަނުކޮށްފައިވަނީ މި އަހަރުގެ ޖަނަވަރީ މަހުގެ ތެރޭގައެވެ.
މި ބަދަލުގެ އިތުރުން، ސަރުކާރު ހިއްސާވާ އިތުރު ދެ ކުންފުންޏެއްގެ ބޯޑަށް ވެސް ޕީސީބީއިން މިއަދު ބަދަލު ގެނެސްފައިވާކަން ފާހަގަކުރެވެއެވެ.
