މާލެ ސަރަހައްދުގައި ރަޖިސްޓްރީނުކޮށް ހުރި އުޅަނދުތައް ރަޖިސްޓްރީ ކުރެވެންދެން ހުޅުމާލޭގައި ވަގުތީ ގޮތުން ޕާކުކުރެވޭ ގޮތަށް ބިމެއް ހަމަޖައްސައިފިއެވެ.
ހުޅުމާލެ ދެވަނަ ފިޔަވަހީގައި ހުންނަ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ފްލެޓު ކުރިމަތީގައި އޮންނަ 40،000 އަކަފޫޓުގެ ހުސް ބިން އެޗްޑީސީން މިއަދު ވަނީ ޓްރާންސްޕޯޓް މިނިސްޓްރީއާ ހަވާލުކޮށްފައެވެ. މި ބިން އެޗްޑީސީގެ ފަރާތުން ހަވާލުކޮށްދެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ. ޓްރާންސްޕޯޓް މިނިސްޓްރީގެ ފަރާތުން މި ބިމާ ހަވާލުވެވަޑައިގެންނެވީ މިނިސްޓަރު މުހައްމަދު އަމީނެވެ. މިއީ 200 ވަރަކަށް ކާރު ނޫނީ ހަތަރު ފުރޮޅުލީ އުޅަނދު ޕާކް ކުރެވޭނެ ޖާގަ ހުރި ބިމެކެވެ.
ހުޅުމާލޭގައި ނޫސްވެރިންނާ ވާހަކަ ދައްކަވަމުން ޓްރާންސްޕޯޓް މިނިސްޓަރު އަމީން ވިދާޅުވީ ރަޖިސްޓްރީ ނުކުރާ އުޅަނދުތަކާއި ގަވައިދާ ހިލާފަށް މާލޭގައި ދުއްވާ އުޅަނދުތައް ގަވައިދަށް ފައްތަން ވަކި މުހުލަތެއް ދިނުމަށާއި އެ އުޅަނދުތައް ވަކި މުއްދަތެއް ވަންދެން ޕާކް ކުރެވޭނެ ބިމެއް ހަމަޖައްސައި ދިނުމަށް ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ކަމަށެވެ. ރައީސްގެ އިރުޝާދާ ގުޅިގެން އެޗްޑީސީއާ ވާހަކަ ދައްކައިގެން ބިން މިހާރު ހަމަޖައްސާފައިވާ ކަން އަމީން ފާހަގަކުރެއްވިއެވެ.
އަމީންގެ ވާހަކައިގައި ވަނީ "ގައުމީ މަސައްކަތެއް" ކަމަށް ދެކިގެން އެޗްޑީސީން ކުރި މަސައްކަތަށް ޝުކުރު ދަންނަވައިފައެވެ. ހާއްސަކޮށް އެޗްޑީސީގެ މެނޭޖިން ޑިރެކްޓަރު ފަޒުލްގެ ނަން އަމީން ފާހަގަ ކުރެއްވިއެވެ.
އަމީން ވިދާޅުވީ މާލެ ސަރަހައްދުގައި ޕާކްކޮށްފައި ހުރި އުޅަނދުތަކުގެ ތެރެއިން ރަޖިސްޓްރީ ނުކުރެވި ހުރި އުޅަނދުތަކާއި ޒޯން އޮޅުވާލައިގެން ގެންގުޅެމުންދާ ވެހިކަލްތަކާއި ނުބައި ނަންބަރު ޕްލޭޓް އަޅުވައިގެން ގެންގުޅޭ ވެހިކަލްތައް އަމިއްލައަށް މި ސަރަހައްދަށް ގެނެސް ބަހައްޓަން މިއަދު އިއުލާނެއް ކުރާނެ ކަމަށެވެ. އެގޮތަށް ބެހެއްޓީމަ ވާނެ ގޮތަކީ ޓޯ ކުރީމަ، ލިބޭ ގެއްލުމެއް ނުލިބޭނެ ކަމަށާއި ޓޯކޮށްގެން ދައްކަން ޖެހޭ ޖޫރިމަނާއަށް ފައިސާ ދައްކަން ނުޖެހޭނެ ކަމަށް އަމީން ވިދާޅުވިއެވެ.
މާލެ ސަހައްދުގައި ދުއްވާ އެހެން ޒޯންތަކުގެ ރަޖިސްޓަރީ އޮންނަ އުޅަނދުތައް އެޗްޑީސީން ދައްކާ ބިމަކަށް އަމިއްލަ އަށް ގެންގޮސް ބާއްވައިގެން، ރަޖިސްޓަރީ ބަދަލުކުރަން ހަ މަސްދުވަހުގެ މުއްދަތެއް ދޭން ނިންމާފައިވާ ކަމަށް އަމީން ވިދާޅުވިއެވެ. އެ ވެހިކަލްތައް އެ ސަރަހައްދަށް ގެންދިއުމަށް 40 ދުވަސް ދޭނެ ކަމަށް އަމީން ވިދާޅުވިއެވެ. މި 40 ދުވަހަށް ފަހު، މާލެ ސަރަހައްދުގައި ގަވައިދާ ހިލާފަށް ހުރި އުޅަނދުތައް ޓޯ ކުރަމުން ދާނެ ކަން ހޯމް މިނިސްޓްރީން ކުރިން ވަނީ ހާމަކޮށްފައެވެ.
އަމީން ވިދާޅުވީ މިއީ ހަ މަސް ދުވަހަށް ބަހައްޓާލަން ދެވޭ ޖާގައެއް ކަމަށެވެ. އެގޮތަށް ޓޯ ކުރީމަ ހަލާކުވެގެން ދާތީ އާއި މިހާ ގިނަ އަދަދެއްގެ ވެހިކަލްތަކެއް ނުބައިކޮށް މާލެ ސަރަހައްދުގައި އުޅޭތީ ކޮންމެވެސް ވަރެއްގެ ފްލެކްސިބިލިޓީއެއް ދިނުމަށް ކުރެވުނު ކަމެއް މިއީ ކަމަށް އަމީން ވިދާޅުވިއެވެ. މި ސަރަހައްދުގައި ފުލުހުން ހަރަކާތްތެރިވުމަށް ހަމަޖެހިފައިވާ އިރު، މި ބިމުގައި ޕާކް ކުރުމަށް ފުލުހުން އެހީތެރިވެދޭނެ ކަމަށެވެ. މިކަމުގެ ސަބަބުން މާލެ ސަރަހައްދުގައި އާންމު ރައްޔިތުން ބޭނުން ކުރާ މަގުތައް ބޭނުން ކުރަން ފަސޭހަ ވާނެ ކަމުގައި އަމީން ވިދާޅުވިއެވެ. އަދި ހުރިހާ ބޭފުޅުން ވެސް އެހެން ހުރި ވެހިކަލްތައް މި ބިމަށް ގެނެސްދެއްވުމަށް އަމީން އެދިވަޑައިގެންނެވިއެވެ.
އެޗްޑީސީގެ މެނޭޖިން ޑިރެކްޓަރު ފަޒުލް ވިދާޅުވީ އެޗްޑީސީގެ މަސައްކަތަކަށް ވާނީ ރައީސް ޑރ. މުއިއްޒުގެ އިރުޝާދާ އެކުގައި ޕާކިން މައްސަލައަށް ހައްލެއް ގެނައުން ކަމަށެވެ. އެގޮތުން އެޗްޑީސީން ވަރަށް އަވަހަށް ޕާކިން ބިލްޑިންތަކެއް އަޅާނެ ކަމުގައި ފަޒުލް ފާހަގަ ކުރެއްވިއެވެ. އޭރުން ރަޖިސްޓްރީ ކުރެވޭ އުޅަނދުތައް ޕާކިން ބިލްޑިންތަކުގައި ޕާކް ކުރުމުގެ ފުރުސަތު ފަހިވެގެންދާނެ ކަމަށް ވެސް ފަޒުލް ވިދާޅުވިއެވެ. ކުރިއަށް އޮތް ދެ އަހަރު ދުވަހުގެ ތެރޭގައި ޕާކިން މައްސަލައަށް ހައްލު ހޯދަން މަސައްކަތް ކުރަމުން އަންނަ ކަން ފާހަގަ ކުރައްވައި ފަޒުލް ވިދާޅުވީ ޕާކިން ބިލްޑިންތަކުން ގާތްގަނޑަކަށް 4،000 ޖާގަ ހޯދުމަކީ އަމާޒެއް ކަމަށެވެ.
ކޮމެންޓު ފޮނުވާ