ނައިޓު މާކެޓު ބާއްވަން ހުއްދަ ދޫކުރުމުގެ ކަންކަމާއި އުސްފަސްގަނޑު އަލުން އަނބުރާ މާލެ ސިޓީ ކައުންސިލްގެ ދަށަށް ގެނައުމަށް ސަރުކާރުގައި ސިޓީ ކައުންސިލުން އެދިއްޖެ އެވެ. މިހެން ވިދާޅުވެފައިވަނީ މާލެ ސިޓީ ކައުންސިލުން މިއަދު ބޭއްވި އެ ކައުންސިލުގެ 159 ވަނަ ރަސްމީ ޖަލްސާގައި، މާލޭގެ މޭޔަރު އާދަމް އާޒިމް އެވެ.

ކައުންސިލުގެ މިއަދުގެ އެޖެންޑާގައި އެ ދެ މައްސަލަ ހިމަނަން ހުށަހެޅުއްވި އާޒިމް ވިދާޅުވި ގޮތުގައި، ނައިޓު މާކެޓު ބޭއްވުމުގެ ހުއްދަ ދިނުން ކުރިން އޮންނަނީ މާލެ ސިޓީ ކައުންސިލަށެވެ. އަދި މާލޭގެ އާންމު ސަރަހައްދުތަކަކީ ވެސް ކައުންސިލްގެ ބެލުމުގެ ދަށުގައި ހުންނަ ތަންތަން ކަމަށް ލާމަރުކަޒީ ގާނޫނުން ބުނެއެވެ. ނަމަވެސް، މިދިޔަ ސަރުކާރުން ނިންމާފައިވަނީ މާކެޓުތައް ބޭއްވުމުގެ ހުއްދަ ދޭނީ ސަރުކާރުން ކަމަށެވެ. އަނެއްކާވެސް އެކަން ކައުންސިލްގެ ދަށަށް ގެނެސްދޭން ވާނީ ސަރުކާރުގައި އެދިފައެވެ.

މިހާރު ސަރުކާރުން އެކަމަށް ހުއްދަ ދެމުންދިޔަސް، އާންމުންނަށް އަދިވެސް ހީވެފައި އޮންނަނީ އެކަން ކުރަނީ ކައުންސިލުން ކަމަށް ކަމަށާއި އެކަމުގެ ސަބަބުން އިތުރު މައްސަލަތަކެއް ނުކުންނަކަމަށް އާޒިމް ވިދާޅުވިއެވެ. މާލޭގެ ޕަބްލިކް ސްޕޭސްތަކެއް ބޭނުންކޮށްގެން މާކެޓު ބާއްވާ ކަންތައް ކުރީމަ ރައްޔިތުން ހީކުރަނީ އެއީ ކައުންސިލުން ކުރާ ކަމެއް ކަމަށާއި، އެކަން ކުރާއިރު އެތަންތަން ވަރަށް ބޮޑަށް ގޮނޑުވާ ކަމާއި އެކަން ކުރަނީ ވެސް ގިނަ ފަހަރު ސަތަރި ޖަހައިގެން އެހާ ފެންވަރު ރަނގަޅު ގޮތަކަށް ނޫންކަން މޭޔަރު ފާހަގަކުރެއްވިއެވެ.

އުސްފަސްގަނޑުގައި ވެސް އެފަދަ މާކެޓުތައް ބާއްވަނީ ހައުސިން މިނިސްޓްރީން ދޭ ހުއްދައެއްގެ ދަށުންކަން ފާހަގަކުރައްވައި އާޒިމް ވިދާޅުވީ، މާލޭގައި އެއްވެސް މާކެޓެއް ބޭއްވުމަށްޓަކައި މިއަދު ކައުންސިލަށް އެއްވެސް ހުއްދައެއް ނުދެވޭ ކަމަށް އާޒިމް ވިދާޅުވެފައިވެއެވެ. ކައުންސިލްގައި އުސްފަސްގަނޑުގެ ރަޖިސްޓްރީ އޮތުމުން، ކައުންސިލަށް އެ ހުއްދަ ދެވޭނެ ކަމަށް ގަބޫލުކުރެވިގެން މިފަހުން އުސްފަސްގަނޑުގައި ހަރަކާތެއް ބާއްވަން ކައުންސިލުން ވަނީ ބަޔަކަށް ހުއްދަ ދީފައެވެ. ނަމަވެސް، ހައުސިން މިނިސްޓްރީން ވަނީ އެ ހުއްދަ ބާތިލުކޮށް، އެކަން އެންގުމަށް ކައުންސިލަށް ސިޓީއެއް ފޮނުވާފައިކަންވެސް އާޒިމް ފާހަގަ ކުރެއްވިއެވެ.

މިހާރު ކަންކަން އޮތް ގޮތުން ރައްޔިތުންނަށް ދަތިތައް ކުރިމަތިވެ، އެންމެ ރަނގަޅަށް ނައިޓު މާކެޓުތަކުގެ ކަންކަމާއި އުސްފަސްގަނޑު ފަދަ ތަންތަން ނުބެލެހެއްޓޭ ކަމުގެ ކަންބޮޑުވުން އާންމުންގެ ފަރާތުން ލިބެމުންދާކަން އާޒިމް ފާހަގަކުރެއްވިއެވެ. އޭނާ ވިދާޅުވި ގޮތުގައި، އެ ތަންތަނުގެ ސާފުތާހިރުކަން ކުޑަވުމުގެ ޝަކުވާ ބޮޑެވެ. އެ ބިން ސާފުކޮށް ބެލެހެއްޓުމާއި އެ ބިމުގެ ވަށައިގެންވާ މާހައުލު ބެލެހެއްޓުމާއި މިކަންކަން ކުރާނީ ކޮން ބައެއްތޯ އާޒިމް ސުވާލު އުފެއްދެވިއެވެ. އެތަނަށް އަޅާހާ ކުންޏަކާ، އެ ތަނަށް މީހުން އަރައިގެން އުޅޭ އުޅުމާއި އެ ތަނުގެ ސެކިއުރިޓީ އާއި އެ ތަނުގެ ދިއްލުމާއި އެ ޓްރައިޕޮޑްތަކަށް އަޅާހާ ތެލަކާއި ކުންޏަކާ ފުޅިތަކާ މިހާރު ވެސް ނަގަމުން ދަނީ ކައުންސިލުންކަންވެސް އޭނާ ފާހަގަކުރެއްވިއެވެ.

މިހާރު ނައިޓު މާކެޓުތައް ބާއްވަމުންދަނީ ސަތަރި ދަމައިގެން އާންމުންނަށް އުނދަގޫވާ ގޮތަށްކަން ފާހަގަކުރައްވައި ކައުންސިލްގެ ދަށުން އެކަން ކުރާ ނަމަ، އެފަދަ މާކެޓުތަކަށް ކައުންސިލުން ޓެންޓު ޖަހައިދޭނެ ކަމަށް ވެސް އާޒިމް ވިދާޅުވިއެވެ. ކައުންސިލަކީ އިމްޕްލިމެންޓް ކުރާ އޭޖެންސީއެއް ކަމަށާއި، މަޖިލީހަކީ ގާނޫނު ހަދާ ތަން ކަމަށާއި، ސަރުކާރަކީ ޕޮލިސީ މޭކާސް ކަމަށް ފާހަގަކުރައްވައި، އެ ކަންތައްތައް ކައުންސިލްގެ ދަށަށް އައިސްފިއްޔާ މާ ރަނގަޅަށް ބެލެހެއްޓޭނެ ކަމަށް އޭނާ ވިދާޅުވިއެވެ.

އެކަމަށް ތާއީދު ކުރައްވާ ކައުންސިލްގެ އިތުރު މެމްބަރުން ވެސް ވަނީ މިއަދުގެ ޖަލްސާގައި ވާހަކަ ދައްކަވާފައެވެ. މިދިޔަ ސަރުކާރުގައި ކައުންސިލުން ނައިޓު މާކެޓުތަކަށް ހުއްދަ ދޫކުރުމާއި އުސްފަސްގަނޑު މިނިސްޓްރީގެ ދަށަށް ނަގާފައިވީ ނަމަވެސް، މި ސަރުކާރުން އެކަންކަން ކައުންސިލްގެ ދަށަށް ބަދަލުކޮށްދެއްވާނެ ކަމުގެ އުންމީދު ބޮޑު ކަމަށް މޭޔަރު ވިދާޅުވިއެވެ.