ކޯވިޑް19 ވެކްސިން ގަތުމަށް ބެނުންވާ ފައިސާ، ގައުމުން ބޭރަށް ޓްރާންސްފަރ ކުރުމުގެ ވަގުތީ ހުއްދައެއް އެމެރިކާއިން ދޫކޮށްފައި ވާކަމަށް، އިރާނުންގެ ސެންޓްރަލް ބޭންކުން ބުނެފިއެވެ.
އެމެރިކާއިން، ޑޮލަރު ޓްރާންސްފަރ ކުރުމުގެ ވަގުތީ ހުއްދައެއް އިރާނަށް ދޫކޮށްފައިވާއިރު، އިރާނުގައި މިބަލީގައި މީހުން މަރުވާ ނިސްބަތް ޖެހިޖެހިގެން 3 މަހު މިވަނީ ދަށަށް ގޮސްފައެވެ.
އިރާނުގެ ސެންޓްރަލް ބޭނުންކުގެ ގަވަރުނަރު، އަބުދުއްނާސިރު ހައްމަޓީ ވިދާޅުވި ގޮތުގައި، ކޯވިޑް19 ވެކްސިން ގަތުމަށް ބޭނުންވާ ފައިސާ ސުވިސް ބޭންކަކަށް ޖަމާކުރުމުގެ ހުއްދަ، އެމެރިކާގެ ޓްރެޒަރީ އޮފީހުގެ ފޮރިންގ އެސެޓްސް ކޮންޓްރޯލް ޑިވިޒަނުން އިރާނުގެ ބޭންކަކަށް މިހާރު ދޫކޮށްފައި ވާކަމަށެވެ.
"އެމީހުން (އެމެރިކާއިން) ވަނީ އަހަރުމެންގެ ހުރިހާ ބޭންކަކާ ދެކޮޅަށްވެސް ދަތިކުރުމުގެ ފިޔަވަޅުތައް އަޅާފަ. އެހެންމަވެސް، މި ފައިސާ ޓްރާންސްފަރ ކުރުމުގެ ފުރުސަތު ދޭން އެމީހުންނަށް މަޖުބޫރުވީ، ދުނިޔޭގެ އެކި ކަންކޮޅުތަކުގައި، މިކަމުމުގައި އެމީހުންނަށް އަމާޒުވެފަހުރި ފާޑުކިއުންތަކުގެ ސަބަބުން،" އިރާނުގެ މަރުކަޒީ ބޭންކުގެ ގަވަރުނަރު ހައްމަޓީ އިރާނުގެ ގައުމީ ޓީވީއަށް މައުލޫމާތު ދެމުން ވިދާޅުވެފައި ވެއެވެ.
ހައްމަޓީ ވިދާޅުވެފައިވަނީ، ފުރަތަމަ ބުރުގައި، COVAX އިން ވެކްސިންގެ 16.8 މިލިއަން ޑޯޒު ގަތުމަށްޓަކާ އިރާނުން 244 މިލިއަން ޑޮލަރު ޚަރަދު ކުރާނެއެވެ.
COVAXއަކީ، މެދުފަންތިއަށްވުރެ ދަށްކޮށް އާމްދަނީ ލިބޭ ގައުމުތަކަށް ކޯވިޑް ވެކްސިން ހަމަހަމަ ކަމާއެކު ފޯރުކޮށްދިމުނަށް އުފައްދާފައި، އެތައް އޭޖެންސީއެއްގެ މައްޗަށް އެކުލެވޭ ގުރޫޕެކެވެ.
އިރާނުން ކުރިން ބުނެފައިވަނީ، ކޯވިޑް ވެކްސިން ގަތުމަށް ބޭނުންވާ ފައިސާ COVAXއަށް ދެކުމަށް، އެރިކާގެ ދަތުކުރުމުގެ ފިޔަވަޅުތަކުގެ ސަބަބުން އެގައުމަށް ދަތިވެފައިވާ ކަމަށެވެ. COVAXއިން ވެކްސިން ގަތުމަށް މިހާރުވެސް ދުނިޔޭގެ 190 ގައުމަކުން ވަނީ އެއްބަސްވުންތަކުގައި ސޮއި ކޮށްފައެވެ.
އިރާނުގެ ޝިފާ ފާމްޑް ނަމަކަށް ކިޔާ ކުންފުނިން ވަނީ، އެގައުމުން އަލަށް އީޖާދު ކުރާ ކޯވިޑް19 ވެކްސިންގެ ތަހުލީލުތަކަށް ބޭނުންވާ "ހިއުމަން ޓްރަޔަލް" ތަކުގައި އަމިއްލައަށް ބައިވެރިވާން ބޭނުންވާ މީހުން ރެޖިސްޓަރވުމަށް ފުރުސަތު ހުޅުވާލާފައެވެ.
ޝިފާ ފާމްޑްއަކީ، އިރާނުގެ ސުޕްރީމް ލީޑަރު އާޔަތުއްﷲ އަލީ ޚާމަނެއި ކޮންޓްރޯލް ކުރާ ބިޔަ ވިޔަފާރި ވިއުގައެއްގެ ސަބްސިޑިއަރީ ކުންފުންޏެކެވެ.
އިރާނުގެ ހެލްތު މިނިސްޓްރީގެ ތަރުޖަމާނު ސިމާ ސާދާތު ލާރި އިރާނުގެ ގައުމީ ޓީވީގައި ވާހަކަ ދައްކަވަމުން ވިދާޅުވެފައިވަނީ، ފާއިތުވެދިޔަ 24 ގަޑިއިރު އެކަނިވެސް އެގައުމުގައި ކޯވިޑް19 އަށް ޕޮޒިޓިވް ވެގެން 152 މީހުން މަރުވެފައިވާ ކަމުގައެވެ. އެހެން ނަމަވެސް މިއީ މިއަހަރުގެ ސެޕްޓެމްބަރ 18 އަށްފަހު، އެގައުމުގައި މިބަލީގައި އެންމެ މަދުން މީހުން މަރުވެފައިވާ ދުވަހެވެ.
އިރާނަކީ މުޅި މެދުއިރުމަތިންވެސް ކޯވިޑް19ގެ އަސަރު އެންމެ ބޮޑަށް ކޮށްފައިވާ ގައުމަށް ވާއިރު، އެގައުމުގައި މިހާތަނަށް 54،308 މީހުންވަނީ މބަލީގައި މަރުވެފައެވެ.
