އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ނަރުހަކު މަސްތުވާތަކެތި ބޭނުންކުރާކަމުގެ ތުހުމަތުގައި ފުލުހުން ވަނީ ތަޙުޤީޤެއް ފަށާފައިވާކަން ފުލުހުން ހާމަކޮށްފިއެވެ. މި މައްސަލަ ފުލުހުންގެ ސަމާލުކަމަށް ގެނެސްފައިވަނީ އައިޖީއެމްއެޗްގެ މެނޭޖްމަންޓުންނެވެ.
ހޮނިހިރު ދުވަހު ފުލުހުންގެ ތަރުޖަމާނު މީޑިއާތަކަށް މަޢުލޫމާތު ދިންގޮތުގައި މި މައްސަލަ ފުލުހުންނަށް ހުށަހަޅާފައިވަނީ ދެ ހަފްތާ ކުރިންނެވެ. އަދި މި މައްސަލަ މިހާރު ފުލުހުން ތަޙުޤީޤުކުރަމުންދާކަން އޭނާ ކަށަވަރުކޮށްދީފައިވެއެވެ.
ނަމަވެސް، މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެއެވެ.
މަސްތުވާތަކެތީގެ ނުރައްކާ އަކީ ދިވެހިރާއްޖެ ދިމާވެފައިވާ އެންމެ ބޮޑު އިޖްތިމާޢީ މައްސަލަތަކުގެ ތެރެއިން އެއް މައްސަލައެވެ. 2023 ވަނަ އަހަރު މަސްތުވާތަކެއްޗާ ގުޅުންހުރި 1،750 މައްސަލައެއް ފުލުހުންނަށް ރިޕޯޓުކުރެވިފައިވެއެވެ. މި އަހަރުގެ މިހާތަނަށް މިފަދަ 1،010 އަށްވުރެ ގިނަ މައްސަލަ ވަނީ ރިޕޯޓުކުރެވިފައެވެ.
