މާލޭ ބޮޑުތަކުރުފާނު މަގުގައި ހުންނަ މ. ހަސޯވާގެ އިމާރާތުގެ 9 ވަނަ ފަންގިފިލާއިން ވެއްޓުނު އަންހެނަކު ނިޔާވެއްޖެކަމަށް ފުލުހުން މިއަދު ހާމަކޮށްފިއެވެ. މި ހާދިސާ ހިނގާފައިވަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) ކައިރީގައެވެ.
ފުލުހުންގެ ފަރާތުން ބުނެފައިވަނީ މި މައްސަލައިގެ ތަޙްޤީޤު މިހާރު ކުރިއަށްދާ ކަމަށެވެ. އަދި މި ހިތާމަވެރި ހާދިސާއާ ގުޅިގެން، ނިޔާވި ފަރާތުގެ އާއިލާގެ އިޙްސާސްތަކަށް އިޙްތިރާމްކުރުމުގެ ގޮތުން، ހާދިސާގެ ފޮޓޯތަކާއި މަންޒަރުތައް މީސްމީޑިއާގައި ޝާއިޢުނުކުރުމަށް ފުލުހުން އާންމުންނަށް އިލްތިމާސްކޮށްފައިވެއެވެ.
"ޚަބަރު އޮންލައިން" އަށް މަޢުލޫމާތު ދިން އެ ސަރަޙައްދުގައި ހުރި ފަރާތެއް ބުނެފައިވަނީ، އެ އަންހެން މީހާ ވެއްޓިފައިވަނީ އެ ސަރަޙައްދުގައި ޕާކުކޮށްފައި ހުރި ޕިކަޕެއްގެ ތެރެއަށް ކަމަށާއި، ޕިކަޕުގެ ތެރޭގައި ގިނަ އަދަދެއްގެ ލޭ ހުރި ކަމަށެވެ.
ހާދިސާއާ ގުޅިގެން ނިޔާވި އަންހެން މީހާއަށް ފުރަތަމަ ފަރުވާ ދިނުމަށް ގެންގޮސްފައިވަނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށެވެ.
މި ހާދިސާއާ ގުޅޭ އިތުރު މަޢުލޫމާތު ލިބުމުން އާންމުކުރާނެ ކަމަށް ފުލުހުން ބުނެފައިވެއެވެ.
