ފޮރިން މިނިސްޓަރު މޫސާ ޒަމީރު ބަޙްރެއިންގެ ވަލީޢަހުދު އަދި ބޮޑުވަޒީރު ސަލްމާން ބިން ޙަމަދު އަލް ޚަލީފާއާ ބައްދަލުކުރައްވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޓީފުޅެއް ބަޙްރެއިންގެ ރަސްގެފާނު ޙަމަދް ބިން ޢީސާ އަލް ޚަލީފާއަށް އަރުވައިފިއެވެ.
މިނިސްޓަރު ޒަމީރު އިއްޔެ ބަޙްރެއިނަށް ވަޑައިގެންނެވީ އެ ޤައުމުގެ ފޮރިން މިނިސްޓަރު ޑރ. ޢަބްދުއްލަޠީފް ބިން ރާޝިދުގެ ދަޢުވަތަކަށެވެ. ފޮރިން މިނިސްޓްރީން ބުނެފައިވާ ގޮތުގައި މިއަދު މިނިސްޓަރު ޒަމީރު ބަޙްރެއިންގެ ވަލީޢަހުދު އަދި ބޮޑުވަޒީރާ ބައްދަލުކުރައްވައި، ރައީސް މުޢިއްޒުގެ ސިޓީފުޅު އަރުވާފައިވެއެވެ.
މި ދަތުރުފުޅުގައި ދިވެހިރާއްޖެއާއި ބަޙްރެއިންގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރައްވާނެ ކަމަށް ވެއެވެ. މިނިސްޓަރު ޒަމީރުގެ މި ދަތުރުފުޅު މި މަހުގެ 15 ވަނަ ދުވަހާ ހަމައަށް ދެމިގެންދާނެއެވެ.
ދިވެހިރާއްޖެއާއި ބަޙްރެއިންގެ ސިޔާސީ ގުޅުން ޤާއިމުކުރިތާ މިއަހަރަށް 44 އަހަރު ފުރޭނެއެވެ. މި ދަތުރުފުޅަކީ ދެ ޤައުމުގެ ދެމެދުގައިވާ އެކުވެރިކަން އިތުރަށް ވަރުގަދަކުރުމަށް މަގުފަހިވެގެންދާނެ ދަތުރުފުޅެއް ކަމަށް ބެލެވެއެވެ.
