މޯލްޑިވްސް ޓްރޭޑް އެސޯސިއޭޝަން (އެމްޓީއޭ)އިން އިންތިޒާމްކޮށްގެން ބޭއްވި "މިނިވަން އުފާ ނައިޓް މާރކެޓް" ނިންމާލައިފިއެވެ. އެމްޓީއޭއިން ބޭއްވި މި ނައިޓް މާރކެޓް ބޭއްވިގެން ދިޔައީ މި އޮގްސްޓުމަހުގެ 1 އިން 11 އަށެވެ.
ފަހުގެ ތާރީޚެއްގައި މާލޭ ސަރަހައްދުގައި ބޭއްވި އެންމެ ބޮޑު ވިޔަފާރި ހަރާކާތުގެ ގޮތުގައި ފާހަގަކުރެވުނު މި އިވެންޓުގައި، މާލޭ ސަރަހައްދުގައި އެކި ބާވަތުގެ ވިޔަފާރިކުރާ 100 އަށްވުރެ ގިނަ ވިޔަފާރިވެރިން ބައިވެރިވިކަަމަށް އެމްޓީއޭއިން ބުނެފައި ވެއެވެ. އަދި އެމްޓީއޭއިން ބުނެފައިވަނީ ނައިޓް މާރކެޓްގައި ބައިވެރިވެފައިވަނީ މުޅިންވެސް ދިވެހި ވިޔަފާރިވެރިން ކަމުގައެވެ. މިނައިޓް މާރކެޓްގައި، އާންމުކޮށް ބާޒާރުގައި ލިބެން ހުންނަ އަންނައުނާ، ބަދިގެ އަދި ގޭތެރޭގެ ސާމާނުގެ އިތުރުން ކެއިންބުއިމުގެ އެކި ބާވަތްތައްވެސް ހެޔޮއަގުގައި ވިޔަފާރިވެރިން ވަނީ ވިއްކާފައެވެ.
އެމްޓީއޭއިން ބުނެފައިވަނީ "މިނިވަން އުފާ ނައިޓް މާރކެޓް"އަށް ކޮންމެ ދުވަހަކުވެސް 8،000 އާއި 10،000 އާއި ދެމެދުގެ އަދަދަށް އާންމުން ޒިޔާރަތް ކޮށްފައިވާ ކަމުގައެވެ. އަދި މާލޭގެ ކައިރި ރަށްރަށުންވެސް މި ނައިޓް މާރކެޓަށް މީހުން ޒިޔާރަތް ކޮށްފައިވާކަމަށްވެސް އެމްޓީއޭއިން ބުނެފައިވެއެވެ.
މޯލްޑިވްސް ޓްރޭޑް އެސޯސިއޭޝަން (އެމްޓީއޭ)އަކީ ވިޔަފާރިވެރިންގެ ހައްގުގައި މަސައްކަތް ކުރުމަށް އުފައްދާފައިވާ ޖަމިއްޔާއެކެވެ. އެގޮތުން އެޖަމިއްޔާއިން ވަނީ ފާއިތުވެދިޔަ ތަނުގައި، ވިޔަފާރިވެރިންނަށް ކުރިމަތިވާ ބައެއް މައްސަލަތަކަށް ހައްލު ހޯދުމަށް ސަރުކާރާއި ދައުލަތުގެ ބައެއް މުވައްސަސާތަކާއި ގުޅިގެން މަސައްކަތް ކޮށްފައެވެ.
