މާފަރު އިންޓަނޭޝަނަލް އެއާޕޯޓުގެ އޭޕްރަން ފުޅާކުރުމަށް އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސް) އާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ދެމެދު މިއަދު އެއްބަސްވުމެއްގައި ސޮއިކުރެވިއްޖެއެވެ.
މި އެއްބަސްވުމުގައި ސޮއިކުރެއްވީ އައިއޭއެސްގެ މެނޭޖިން ޑިރެކްޓަރު އިބްރާހިމް އިޔާސް އާއި އެމްޓީސީސީގެ ސީއީއޯ އަދި މެނޭޖިން ޑިރެކްޓަރު އަބްދުﷲ ޒިޔާދެވެ. މި މަޝްރޫޢަކީ ޕްރިމިއަރ ގްލޯބަލް އޭވިއޭޝަން ހަބެއްގެ ގޮތުގައި ތަރައްޤީކުރުމަށް ރޭވިފައިވާ ޕްރޮޖެކްޓެކެވެ.
މި މަޝްރޫޢުގެ ދަށުން 15,300 އަކަމީޓަރުގެ ސަރަހައްދެއްގައި ތާރު އެޅުމުގެ މަސައްކަތް ކުރެވޭނެއެވެ. މިހާރު މާފަރު އެއާޕޯޓުގައި އެއްފަހަރާ 13 ބިޒްނަސް ޖެޓް ޕާކުކުރެވޭއިރު، މި މަޝްރޫޢު ނިމުމުން އެއްފަހަރާ 26 ބިޒްނަސް ޖެޓް ޕާކުކުރެވޭނެ ކަމަށް މޯލްޑިވިއަނުން މަޢުލޫމާތު ދީފައިވެއެވެ.
މޯލްޑިވިއަނުން އިތުރަށް ބުނެފައިވަނީ މި މަސައްކަތް ނިންމުމަށް ހަމަޖެހިފައިވަނީ 6 މަސްދުވަހުގެ ތެރޭގައި ކަމަށެވެ. އަދި މަސައްކަތް ނިމުމުން، އެއާޕޯޓުގެ ޚިދުމަތުގެ ފެންވަރު އިތުރަށް ރަނގަޅުވެ، މަތީ ފަންތީގެ ދަތުރުވެރިންނާއި ބިޒްނަސް ޖެޓް އޮޕަރޭޓަރުންނަށް އިސްކަންދޭ މަންޒިލަކަށް އެއާޕޯޓު ވެގެންދާނެ ކަމަށްވެސް މޯލްޑިވިއަނުން ފާހަގަކޮށްފައިވެއެވެ.
