މި ސަރުކާރު ވެރިކަމާ ހަވާލުވިއިރު ސިއްހީ ދާއިރާއާ ގުޅުންހުރި ޚަރަދުތަކުގެ ގޮތުގައި އެސްޓީއޯއަށް ދައްކަންޖެހޭ ގާތްގަނޑަކަށް 300 މިލިއަން ރުފިޔާ ހުރިކަމަށް ހެލްތު މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ. މި މަޢުލޫމާތު އޭނާ ހާމަކުރެއްވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބުދެއްވަމުންނެވެ.
މިނިސްޓަރު ޚަލީލް ވިދާޅުވި ގޮތުގައި، "އަޅުގަނޑުމެން ސަރުކާރާ ހަވާލުވިއިރުގައި އެސްޓީއޯއަށް ދައްކަންޖެހޭ ގާތްގަނޑަކަށް 300 އެއްހާ މިލިއަން ރުފިޔާ އޮތް، ކޮންސިއުމަބަލްސް، ރިއެޖެންޓްސް އަދިވެސް އެހެން ސިއްހީ ދާއިރާއާ ގުޅުންހުރި ބައެއް ޚަރަދުތަކުގެ." ނަމަވެސް، އޭނާ ފާހަގަކުރެއްވި ގޮތުގައި މިހާރު އެ އަދަދުގެ ބޮޑު ބައެއް ވަނީ އަދާކޮށްފައެވެ.
މިކަމުގެ ސަބަބުން މެޑިކަލް ކޮންސިއުމަބަލްސް ފޯރުކޮށްދިނުމުގައި އެސްޓީއޯއަށް ލުއިފަސޭހަވެފައިވާ ކަމަށް އޭނާ ވިދާޅުވިއެވެ.
ހޮސްޕިޓަލްތަކާއި ސިއްހީ މަރުކަޒުތަކުން މެޑިކަލް ކޮންސިއުމަބަލްސް ހުސްވުމަކީ އަބަދުވެސް ދިމާވާ ކަމެއްކަމަށް މިނިސްޓަރު ފާހަގަކުރެއްވިއެވެ. ނަމަވެސް، މެޑިކަލް ކޮންސިއުމަބަލްސް މެދުނުކެނޑި ފޯރުކޮށްދިނުމަށް މަސައްކަތްކުރަމުންދާ ކަމަށް އޭނާ ވިދާޅުވިއެވެ.
މީގެ އިތުރުން، ރަށްރަށުގެ ހޮސްޕިޓަލްތަކާއި ސިއްހީ މަރުކަޒުތަކުގައި މެޑިކަލް ކޮންސިއުމަބަލްސް ހުރި އަދަދު ދެނެގަތުމަށް ސޮފްޓްވެއަރއެއް ތައްޔާރުކުރަމުންދާ ކަމަށް ޚަލީލް ހާމަކުރެއްވިއެވެ.
"އެ ސޮފްޓްވެއަރގެ ތެރެއިން އަޅުގަނޑުމެންނަށް އެނގިގެންދާނެ ރަށްރަށުގައި ކޮންސިއުމަބަލްސް ހުރި އަދަދު," އޭނާ ވިދާޅުވިއެވެ.
މި ސިސްޓަމްގެ ސަބަބުން ހޮސްޕިޓަލްތަކާއި ސިއްހީ މަރުކަޒުތަކަށް ފޮނުވަންޖެހޭ ތަކެތި ދެނެގަނެ، އެތަކެތި ފޯރުކޮށްދިނުމަށް ފަސޭހަވެގެންދާނެކަން މިނިސްޓަރު ޚަލީލް ފާހަގަކުރެއްވިއެވެ.
