ރާއްޖެ އެތެރެކޮށްފައިވާ އަލެގްރާ ބޭހުގެ 3 ބެޗެއްގެ ކޮލިޓީ މައްސަލައެއް ފާހަގަވެފައިވާކަމަށް ބޭސް އުފައްދާ ކުންފުނިން އެލާޓް ކޮށްފައިވާތީ އެ ބޭސް ރާއްޖެއަށް އެތެރެކުރުމާއި ވިއްކުމާއި ބޭނުންކުރުން މަނާކޮށްފިއެވެ.
މޯލްޑިވްސް ފުުޑް އެންޑް ޑްރަގް އޮތޯރިޓީން ނެރެފައިވާ އެލާޓެއްގައި ވާގޮތުން، އަލެގްރާ 30 މިލިގްރާމް / 5 މިލިލީޓަރު (ފެކްސޯފެނަޑިން ހައިޑްރޯކްލޮރައިޑް) ގެ ތިން ބެޗަކުން ވަނީ މައްސަލަ ފާހަގަކުރެވިފައެވެ. އަދި މިކަން އެފްޑީއޭގެ ސަމާލުކަމަށް ގެނެސްފައިވަނީ މިބޭސް އުފައްދާ އިންޑިއާގެ ސަނޯފީ އިންޑިއާ ލިމިޓެޑުންނެވެ.
މިއާއެކު މި ތިން ބެޗުގެ ބޭސް އެތެރެކުރުމާއި، ބޭނުން ކުރުމުގެ ވިއްކުންވެސް އެފްޑީއޭއިން ވަނީ މަނާ ކޮށްފައެވެ. އަދި މި ބޭހުގެ މި ބެޗުތައް ފާމަސީ، ބޭސް ގުދަނެއް ނުވަތަ ސިއްހީ ޚިދުމަތްދޭ އެއްވެސް ތަނެއްގައި ހުރި ނަމަ [email protected] ، މި މެއިލް އެޑްރެސް މެދުވެރިކޮށް އެފްޑީއޭއަށް އެންގުމަށް އެ އޮތޯރިޓީން ވަނި އިލްތިމާސްކޮށްފައެވެ.
މިކަމާ ގުޅޭ އިތުރު މައުލޫމާތު ހޯދުމަށް ގުޅުއްވާނީ އެފްޑީއޭގެ ހޮޓްލައިން ނަންބަރު 7200321 އަށެވެ.
މި އަހަރުގެ ތެރޭގައި ވަނީ ރާއްޖޭގައި ވިއްކަމުން އައި ޕެނަޑޯލްގެ ސްޓޮކެއްވެސް ވިއްކުން އެމްއެފްޑީއޭއިން މަނާކޮށްފައި ވެއެވެ. އެއީވެސް އެ ސްޓޮކްގައި މައްސަލަތަކެއް ހުރިކަން ފާހަގަކުރެވިގެން ކަމަށް އޭރު އެމްއެފްޑީއޭއިން ބުނެފައި ވެއެވެ. އެހެންނަމަވެސް ފަހުން ވަނީ ޕެނަޑޯލް ވިއްކުން ހުއްދަކޮށްފައެވެ.
