އަންހެން ކުއްޖެއްގެ ނޭވާ ހޮޅިން ބުރުގާ ޕިނެއް އިއްޔެ ނަގައިފިއެވެ.
އައިޖީއެމްއެޗްގެ ނޭވާލާ ނިޒާމުގެ ބަލިތަކާ ބެހޭ ހާއްސަ ޑރ. މުހައްމަދު އިސްމާއިލް "އެކްސް" ގައި ކުރެއްވި ޕޯސްޓެއްގައި ވިދާޅުވީ ޒުވާން އަންހެން ކުއްޖެއްގެ ނޭވާ ހޮޅި ތެރެއިން ބުރުގާ ޕިނެއް ނަގާފައިވާ ކަމަށެވެ. އެކަން އެހެންވީ އަނގައިގެ ތެރެއަށް ޕިނެއް ލައިގެން އުޅެނިކޮށް ކަމަށް އޭނާ ވިދާޅުވިއެވެ.
"މިހާރު ބޮޑުވަމުން އަންނަ ކުދިންނަށް މައިންބަފައިން އިރުޝާދު ދޭންވީ ޝޯލް ނުވަތަ ބުރުގާ އަޅާއިރު އަނގަޔަށް ޕިން ލައިގެން ނޫޅުމަށް،" މުހައްމަދު ވިދާޅުވިއެވެ.
ހަށިގަނޑު ތެރެއަށް މިގޮތަށް ދާ ޕިން ނެގުމަށް، ޑޮކްޓަރުން ބުރަ މަސައްކަތެއް ކުރަން ޖެހެއެވެ. ބައެއް ފަހަރަށް އެކަމަށް ދެ ތިން ގަޑިއިރު ވެސް ނަގައެވެ. މިއީ މީހާ ހޭނައްތާލައިގެން ކުރަން ޖެހޭ، އުނދަގޫ އަދި ނުރައްކާ ވެދާނެ ފަދަ ޕްރޮސީޖާއެކެވެ. ނޭވާލާ ހޮޅި ނުވަތަ ފުއްޕާމޭގެ ތެރެއަށް މިގޮތަށް ދާ ޕިން ނަގަނީ ނޭފަތުން ނުވަތަ އަނގައިން ބްރޮންކޮސްކޮޕީއެއް ލައްވައިގެންނެވެ.
މީގެކުރިން ވެސް ކުޑަކުދިންގެ ނޭވާ ހޮޅިންނާއި ބަނޑު ފަދަ ތަންތަނުން ޕިން ނަގަން ގިނަ ޕްރޮސީޖާތަކެއް ފުރިހަމަ ކުރަން ޖެހުނެވެ.
