ޖިންސީ ގޮތުން ފިރިހެނުން ވަރުގަދަ ކޮށްދޭ ކަމަށް ބުނެ ވިއްކަމުން އަންނަ މާމުއި ވިއްކުން މަނާ ކުރުމުން އެ ތަކެތި ވިއްކުން ނުހުއްޓުވޭތީ އެ ބާވަތް ރާއްޖެ އެތެރެކުރުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު މަނާކޮށްފިއެވެ.
އެމްއެފްޑީއޭ އިން ނެރުނު ބަޔާނެއްގައި ބުނީ ސޯޝަލް މީޑިއާގެ ޕްލެޓުފޯމްތަކުގައި ވިއްކާ މާމުއިގައި "ޓަޑަލަފިލް" އަދި "ސިލްޑަނަފިލް" ހިމެނޭ ކަމަށެވެ.
އެމްއެފްޑީއޭ އިން ބުނެފައިވަނީ އެ ދެ ވައްތަރުގެ މާމުއި ވިއްކަމުންދާތީ އެކަން އާންމުންގެ ސަމާލުކަމަށް 2022 ވަނަ އަހަރު ވެސް ގެނައި ކަމަށެވެ. އެފަދަ އުފެއްދުންތަކަކީ އެމެރިކާގެ ކާބޯތަަކެއްޗާއި ބޭހާއި ގުޅޭ އެފްޑީއޭ އިން ވެސް ރައްކާތެރި ނޫން ކަމަށް ފާހަގަކޮށްފައިވާ އުފެއްދުންތަކެއް ކަމަށް ބުނެފައިވެއެވެ.
އެމްއެފްޑީއޭއިން އަންގާފައި ވަނީ "ބްލެކް ހޯސް ވައިޓަލް" ހަނީ، އާއި "އެޓުމެކްސް ރޯޔަލް ހަނީ ފޯ މެން" ނަމަކަށް ކިޔާ ދެ ބްރޭންޑެއް ނުވިއްކުމަށެވެ. ގެއްލުންދެނިވި ބޭހެއް ކަމަށްވާ ޓަޑަފިލް އަދި ސިލްޑެނަފިލް އެ ދެ ބްރޭންޑުގައި ވެސް ހިމެނޭ ކަމަށް އެމްއެފްޑީއޭއިން ބުންޏެވެ.
ޑޮކްޓަރީ ބޭސް އަޅާފައި ހުންނަ އެފަދަ އުފެއްދުންތައް ބޭނުން ކުރުމަކީ އިންސާނުންގެ ސިއްހަތަށް ނުރައްކާތެރި އަދި ބައެއް ހާލަތްތަކުގައި ފުރާނައަށް ނުރައްވާވެދާނެ ފަދަ ކަމެއް ކަމަށް އެމްއެފްޑީއިން ބުނެފައިވެއެވެ.
އެހެންކަމުން އެފަދަ ތަކެތި ބޭނުން ކުރުމުގެ ސަބަބުން ލިބިދާނެ ސިއްހީ ގެއްލުންތަކުން ރައްޔިތުން ސަލާމަތް ކުރުމަށްޓަކައި އެފަދަ އުފެއްދުންތައް އިމްޕޯޓް ކުރުމާއި ވިއްކުމާއި އަދި ބޭނުންކުރުމަކީ މަނާ ކަމެއް ކަމަށް އެމްއެފްޑީއިން ބުނެފައިވެއެވެ.
