1998 ވަނަ އަަހަރުގެ ކާމިޔާބު ފިލްމް "ސޯލްޖާ" ގެ ސީކުއަލް އެއް ހެދުމަށް ނިންމާފައިވާ ކަމަށް ޕްރޮޑިއުސަރު ރަމޭޝް ތައުރާނީ އިއުލާން ކޮށްފިއެވެ.
"ސޯލްޖާ" އަކީ ލީޑުން ބޮބީ ޑިއޯލް އާއި ޕްރިތީ ޒިންތާ ފެނިގެންދިއަ ވަރަށް މަޝްހޫރު އަދި ބެލުންތެރިންގެ މެދުގައި ވަރަށް ބޮޑު މަޝްހޫރު ކަމެއް ހޯދި ފިލްމްއެކެވެ.
ނިއުސް 18 އަށް ދިން އިންޓަވިއުއެއްގައި ރަމޭޝް ބުނީ އަންނަ އަހަރުގެ ތެރޭގައި ފިލްމުގެ ޝޫޓިން ފަށާނެ ކަމަށެވެ. އެހެންވެ "ސޯލްޖާ 2″ އާ ގުޅޭ ތައްޔާރީތައް މިހާރު ވެސް ކުރިއަށްދާ ކަމަށް ބުންޏެވެ.
ނަމަވެސް މި ފިލްމް އިން ފެނިގެނދާނީ ފުރަތަމަ ފިލްމް އިން ފެނިގެން ދިއަ ކާސްޓު ކަމެއް ނުވަތަ އައު ކާސްޓެއް ކަމެއް އޭނާ ނުބުނެއެވެ. މި ފަހަކަށް އައިސް ކުރީގެ ފިލްމް ތަކުގެ ސީކުއެލް ތަށް ހަދަމުން އަންނަ ކަން ފާހަގަ ކޮށްލެވެއެވެ. އަދި ހަމަ އެއާއި އެކުގައި އެ ފިލްމް ތަކަށް ބެލުންތެރިންގެ ބޮޑު ތަރުހީބެއް ވެސް ލިބެމުން އަންނަ ކަން ފާހަގަކޮށްލެވެއެވެ.
ވަރަށް ގިނަ ދުވަސްތަކެއް ވަންދެން ފިލްމީ މަސައްކަތްތަކާ ދުރުގައި ހުރުމަށް ފަހު، ޕްރިތީ ދާދި ފަހުން ވަނީ ބޮބީގެ ބޭބެ، ސަނީ ޑިއޯލްއާ އެކީ "ލާހޯރް، 1947″ ކިޔާ ފިލްމެއްގެ މަސައްކަތް ނިންމައިފަ އެވެ. އާމިރު ޚާން ޕްރޮޑިއުސްކޮށް، ރާޖްކުމާރު ސަންތޯޝީ ޑައިރެކްޓްކުރި ފިލްމު ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.
ހަމަ އެފަދައިން ބޮބީ ވެސް ވަނީ ވަރަށް ގިނަ ދުވަސްތަކަކަށް ފަހު ބޮލީވުޑްއަށް އެނބުރި އައިސްފައިއެވެ. އެއީ މދިއަ އަހަރު ގެނެސްދިން ކާމިޔާބު ފިލްމް "އެނިމަލް"އެވެ. އެ ފިލްމްގައި ބޮބީ ކުޅެފައިވާ ކެރެކްޓާގައި އޭނާ ދައްކުވައިދިން އެކްޓިންގ އަށް ވަނީ ވަރަށް ބޮޑަށް ތައުރީފް ލިބިގެން ގޮސްފައިއެވެ.
