އެމްޑީޕީގެ ވެރިން މަގާމުތަކުގައި ތިއްބަވަން މަކަރު ހަދަމުން އަންނަ ކަމަށް އެ ޕާޓީގެ ކުރީގެ ޗެއާޕާސަން އަދި ރައްޔިތުންގެ މަޖިލިހުގެ ނައިބު ރައީސް ރީކޯ މޫސާ މަނިކު ތުހުމަތު ކުރައްވައިފިއެވެ.
އިލެކްޝަންސް ކޮމިޝަން (އީސީ) އިން އިއްޔެ ބޭއްވި ލޯކަލް ކައުންސިލް އިންތިހާބުގައި އެމްޑީޕީ އަށް ލިބުނު ނާކާމިޔާބީއާ ގުޅިގެން ރީކޯ މޫސަ "އެކްސް" މިއަދު ކުރެއްވި ޕޯސްޓެއްގައި ވިދާޅުވީ ކޮންމެ އިންތިހާބަކުން އެމްޑީޕީ ބަލިވީމަ، ކޮމިޓީއެއް ހަދައިގެން އިންތިހާބުން ބަލިވި ގޮތް ދިރާސާ ކުރުމަކީ އެމްޑީޕީގެ މިހާރުގެ ވެރިން މަގާމުގައި ދެމި ތިއްބަވަން ހަދާ މަކަރެއް ކަމަށެވެ.
އިއްޔެ ބޭއްވި އިންތިހާބުގެ ދިރާސާ ވަރަށް ސާފު ކަމަށާއި ޕާޓީގެ ވެރިން ކަންތައްތަކެއް ފޮރުވަން ވެގެން ބަޔަކު ރުއްސަން އުޅެނީ ކަމަށް ވެސް ރީކޯ މޫސަ ވިދާޅުވިއެވެ.
ކޮންމެ އިންތިޚާބަކުން ބަލިވީމަ ކޮމެޓީއެއްހަދައިގެންއިންތިޚާބުންބަލިވި ގޮތް ދިރާސާކުރުމަކީ MDPމިހާރުގެ ވެރިންމަގާމުގާ ދެމިތިބެން ހަދާ މަކަރެކެވެ، އިއްޔެބޭއްވިއިންތިޚާބުގެދިރާސާ ވަރައްސާފެވެ ޕާޓީގެވެރިންކަންތައްތަކެއް ފޮރުވަންވެގެން ބަޔަކުރުއްސަން އުޅެނީއެވެ.
— Moosa Maniku (Reeko) (@ReekoMoosa) July 21, 2024
މޫސަ އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ ކޮންމެ އިންތިހާބަކުން އެމްޑީޕީ ބަލިވަމުން އަންނަ ކަމަށެވެ. ވޯޓުލާން ނުކުންނަ މީހުންގެ އަދަދަށް ބަލާއިރު، ކުރިން ވޯޓަށް މީހުން ނެރެން އެމްޑީޕީ ކުރާ މަސައްކަތާ ގާތަށް ވެސް މިހާރު ނުކުރާ ކަމަށް މޫސަ ވިދާޅުވިއެވެ.
ރީކޯ މޫސަ ވިދާޅުވި ގޮތުގައި އެމްޑީޕީގެ ޗެއާޕާސަން ފައްޔާޒް އިސްމާއިލް ހުންނެވީ އަމިއްލަ އެޖެންޑާއެއްގައި މާ ދުރުގައެވެ. އެމްޑީޕީގެ މެމްބަރުން ޕާޓީގެ މުސްތަގުބަލާ ދޭތެރޭގައި ވިސްނަން ޖެހޭ ކަމަށް ވެސް އެ ޕާޓީ އުފެއްދެވުމުގައި އިސްކޮށް މަސައްކަތް ކުރައްވާ މޫސަ ވިދާޅުވިއެވެ.
އީސީން އިއްޔެ ބޭއްވި ހަ ބައި އިލެކްޝަންގެ ތެރެއިން ވެރިކަން ކުރާ މައި ޕާޓީ، ޕީއެންސީން ފަސް ބައި އިލެކްޝަނެއް ކާމިޔާބު ކުރިއިރު، އެމްޑީޕީ އަށް އެއްވެސް ގޮނޑިއެއް ނެގިފައެއް ނުވެއެވެ.
