ވޭތުވެދިޔަ 24 ގަޑިއިރުގެ ތެރޭގައި އެންމެ ބޯކޮށް ވާރޭ ވެހިފައިވަނީ ހއ. ކެލައަށް ކަމަށް މޫސުމާ ބެހޭ ގައުމީ އިދާރާ އިން ހާމަކޮށްފިއެވެ.
މެޓް އޮފީހުން ވަނީ އިއްޔެ ހެނދުނު 8:00 އިން މިއަދު ހެނދުނު 8:00 އަށް ރާއްޖޭގެ އެކި ކަންކޮޅުތަކަށް ވާރޭވެހިފައިވާ މިންވަރުގެ ތަފާސްހިސާބުތައް އާންމުކޮށްފައެވެ. އެގޮތުން އިއްޔެ ކެލަ އަށް 17.6 މިލިމީޓަރުގެ ވާރޭވެހިފައިވެއެވެ.
ދެވަނައަށް އެންމެ ބޯކޮށް ވާރޭވެހުނީ ފ. ނިލަންދޫއަށެވެ. އެރަށަށް 10 މިލިމީޓަރުގެ ވާރޭ ވެހުނުއިރު، ތިން ވަނަ އަށް އެންމެ ބޯކޮށް ވާރޭ ވެހުނީ ރ. އަލިފުއްޓަށެވެ. އެ ރަށަށް 9.3 މިލިމީޓަރުގެ ވާރޭ ވެހިފައިވެއެވެ.
މިއަދުގެ މޫސުން ލަފާކޮށްފައިވާ ގޮތަށް ބަލާއިރު، އުތުރުގެ އެކި ހިސާބަށް ކެރީގެ އަސަރު ފޯރާނެ ކަމަށްވެއެވެ. ދެކުނާއި މެދުރާއްޖެތެރޭގެ ރަށްތަކަށް ކެރީގެ އަސަރު ފޯރިނަމަވެސް، މޫސުން އާންމު ގޮތެއްގައި ރަނގަޅުވާނެ ކަމަށް މެޓުން ލަފާކޮށްފައިވެއެވެ.
