ފައިސާ އާއި މަޝްހޫރު ކަމަކީ ގިނަ ބަޔަކަށް ބަދަލު އަންނަ ކަމެކެވެ. އެކަމުގެ ސަބަބުން މީހުންގެ އުޅުމާއި ގުޅުމަށް ބޮޑެތި ބަދަލުތަކެއް އަންނަ ކަން މިއީ ދުނިޔެ ދައްކައިދީފައިވާ ހަގީގަތެވެ.
އެގޮތުން ފައިސާ އާއި ބާރު ލިބުމުން އިންޑިއާގެ އެއްވަނަ ކްރިކެޓް ކުޅުންތެރިޔާ ވިރާޓް ކޯލީ އަށް ވަރަށް ބޮޑު ބަދަލުތަކެއް އައިސްފައިވާ ކަމަށް ކުރީގެ ކްރިކެޓް ކުޅުންތެރިޔާ އަމިތު މިޝްރާ ބުނެފި އެވެ.
ވިރާޓްގެ އުމުރުން 14 އަހަރުން ފެށިގެން ވިރާޓް ދަންނަ ކަމަށް ބުނަމުން އަމިތު އިތުރަށް ބުނީ އޭރުގެ ވިރާޓްއާއި މިހާރުގެ ވިރާޓް އުޑާއި ބިމާހާ ތަފާތު ކަމަށެވެ. މީގެ ކުރިން ވިރާޓް އަމިތުއަށް ވަރަށް އިހުތިރާމް ކުރާ ކަމަށާއި އެހެން ނަމަވެސް މިހާރު އެ އިހުތިރާމް ގެއްލިފައިވާ ކަމަށް އަމިތު ބުންޏެވެ.
އަމިތު ބުނީ ފައިސާ އާއި ބާރު ލިބޭ މީހުންނާ އެހެން މީހުން ވާހަކަދައްކަނީ ކަމެއް ބޭނުންވެގެން ހެން އެމީހުންނަށް ހީވާ ކަމަށާއި އެހެންވެ ވިރާޓްއާ ވާހަކަ ދެއްކުން ވެސް މުޅިންހެން ހުއްޓާލާފައިވާ ކަމަށެވެ.
މިހާރު ސޯޝަލް މީޑިއާގައި އެންމެ ގިނައިން ދެކެވޭ އެއް ވާހަކަ އަކީ ވިރާޓް އާއި އަންހެނުން އަދި ބަތަލާ އަނޫޝްކާ ޝަރުމާ އިންޑިއާ ދޫކޮށް އެހެން ގައުމަކަށް ބަދަލުވާން އުޅޭ ވާހަކައެވެ. އެއާއި އެކުގައި އިންޑިއާގައި އުފެދުން އެންމެ ކާމިޔާބު އެއް ކްރިކެޓް ކުޅުންތެރިއާ ދޯނީ އާއި އޭނާ އާއި ވެސް ވަނީ އަޅާ ކިޔައިފައިއެވެ.
އެގޮތުން މީހުން ބުނެފައިވަނީ ހުރިހާ މަޝްހޫރު ކަމަކާއި މުއްސަދި ކަމެއް ދޯނީ އަށް ލިބިފައި ވީ ނަމަވެސް އޭނާގެ ދިރިއުޅުން އާރާސްތު ކުރުމަށް ހޮވީ އިންޑިއާ ކަމަށެވެ. އަދި ދުނިޔޭގައި އޭނާ ބޭނުން ކޮންމެ ތާކު ދިރިއުޅުމުގައި އެއްވެސް ހުރަހެއް ނެއް ކަމަށް ވަނީ ބުނެފައިއެވެ.
އަނެއްކޮޅުން ވިރާޓް އަށް މަަޝްހޫރު ކަމާއި ފައިސާ ލިބުނީ އިންޑިއާގެ ސަބަބުން ކަމަށާއި ނަމަވެސް އޭނާ ދިރިއުޅެން ހިޔާރު ކުރީ އިންޑިއާ ނޫން ކަމަށާއި މިކަމުންވެސް ބޮޑު ފިލާވަޅެއް ލިބޭ ކަމަށް ބުނެފައިވެއެވެ.
