އިލްމު ލިބިގަތުމުގެ ހަގީގީ މަންފާއަކަށް ވާންވާނީ، ބޭނުންވާ ބާރުމިނުގައި ގައުމު ހިންގުންކަމުގައި މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
އެކަމަނާ މިފަަދައިން ވިދާޅުވީ ރޭ ހުރަވީ ސުކޫލުގައި ބޭއްވި ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕާއި، ހައި އެޗީވަރސް ސްކޮލަރޝިޕްގެ ލިޔުން ހަވާލުކޮށްދެއްވުމުގެ ރަސްމިއްޔާތު ދެއްކެވި ވާހަކައިގައެވެ.
މި ޖަލްސާގައި ވާހަކަ ދައްކަވަމުން ޑރ. މާރިޔާ ވިދާޅުވީ އެކާވީސް ވަނަ ގަރުނަށް ބޭނުންވާ ހުނަރާއި އިލްމު ލިބިގަނެ، އޭގެ ހަގީގީ މަންފާއަކަށް ވާންވާނީ، ބޭނުންވާ ބާރުމިނުގައި ގައުމު ހިންގުންކަމަށާއި، އެކަން އެގޮތަށް ހިނގާނީ މޮޅު ދިވެހީންގެ ހިދުމަތް މި ޤައުމަށް ލިބިގެންކަމުގައެވެ.
އެކާވީސް ވަނަ ގަރުނަށް ބޭނުންވާ ހުނަރާއި އިލްމު ލިބިގަނެ، އޭގެ ހަގީގީ މަންފާއަކަށް ވާންވާނީ، އަޅުގަނޑުމެން ބޭނުންވާ ބާރުމިނުގައި ގައުމު ހިންގުން.
މިނިސްޓަރު ވިދާޅުވިއެވެ.
މިޖަލްސާގައި މިނިސްޓަރުވަނީ “ހަތަރުވަނަ ސިނާއީ” އިންގިލާބުގެ ހުނަރާއި ސިފަތަކާއިއެކު ގައުމުގެ މުސްތަގުބަލް އާރާސްތުކޮށް، އުޖާލާ ކުރުމުގެ ޒިންމާ އަދާކުރުމަށް އިލްތިމާސް ކުރައްވާފައެވެ.
މަތީ ސާނަވީ އިމްތިހާނުގައި ރާއްޖޭގެ 45 ސްކޫލަކުން 1،407 ދަރިވަރަކު ބައިވެރިވެފައިވާއިރު 136 ދަރިވަރަކު ވަނީ ފަސް މާއްދާ އިން މަތީ ގްރޭޑްތައް ހޯދައިފައެވެ.
އެ ދަރިވަރުންގެ ތެރެއިން 19 ދަރިވަރަކު ވަނީ ފަސް މާއްދާ އިން “އޭ ސްޓާ” ހޯދައި، ރައީސްގެ ސްކޮލާޝިޕް ހާސިލްކޮށްފައެވެ. އަދި 117 ދަރިވަރަކު ފަސް މާއްދާ އިން “އޭ” ހޯދައި ހައި އެޗީވާސް ސްކޮލާޝިޕް ހާސިލްކުރިއެވެ.
