މިސްރުގެ ސަރުކާރުން، އެއްވެސް ދައުވާއެއް ކުރެމެއްނެތި، އަލްޖަޒީރާގެ ނޫސްވެރިޔާ، މުހައްމަދު ހުސެއިން ޖަލަށް ލާފައި ހުންނަތާ 4 އަހަރު ވުމާއި ގުޅިގެން، އަލްޖަޒީރާއިން މިސްރުގެ ސަރުކާރަށް ވަރަށްބޮޑަށް ފާޑު ކިޔައިފިއެވެ.
އަލްޖަޒީރާ ނެޓްވާކުން ބުނެފައިވަނީ، މިސްރުގެ ސަރުކާރުން، އެއްވެސް ދައުވާއެއް ކުރުމެއް ނެތި، ބޭއިންސާފުން މުހައްމަދު ހުސެއިން ޖަލަށް ލިތާ މި ހަފްތާގެ އަންގާރަ ދުވަހަށް 4 އަހަރު ފުރިފައިވާ ކަމަށެވެ.
"އެއްވެސް ދައުވާއެއް އުފުލުމެއް ނެތި، އަދި އެއްވެސް ޝަރީޢަތާކާ ނުލާ، މިސްރުގެ ސަރުކާރުން ހުސެއިން ޖަލަށް ލާފައި ވަނީ، މިސްރުގެ ގާނޫނުތަކާވެސް، އަދި ބައިނަލް އަގުވާމީ ހުރިހާ ގާނޫނަކާވެސް ޚިލާފަށް،" އަލްޖަޒީރާ ނެޓްވާކުން ނެރެފައިވާ ބަޔާނުގައި ބުނެފައި ވެއެވެ.
މުހައްމަދު ހުސެއިން ޖަލުގައި ބަންދު ކޮށްފައިވާ މުއްދަތުގައި، ޝަރީޢަތަކާ ނުލާ، ތުހުމަތު ކުރެވޭ ފަރާތެއް ބަންދުގައި ބެހެއްޓުމަށް މިސްރުގެ ގާނޫނުތަކުން ލިބިދޭ އެންމެ ދިގުމުއްތުވެސް ފާއިތުވެގެން ގޮސްފައިވާތާ އެތަކެއް މަސްތަކެއް ވަނީ ފާއިތުވެގެން ގޮސްފައެވެ. މިއީ ބައިނަލް އަގުވާމީ ގާނޫނުންވެސް ހުއްދަކުރާ ކަމެއް ނޫނެނެވެ.
ޝަރީޢަތަކާ ނުލާ ހުސެއިން ބަންދު ކޮށްފައި ހުންނަ ހުރުން ގާނޫނުގެ ތެރެއަށް ފެއްތުމަށްޓަކާ، މިސްރުގެ ސަރުކާރުން، އެންމެ ފުރަތަމަ ހުސެއިން ޖަލަށްލިތާ 2 އަހަރު ފުރުތަނާ ކަހަލަ ގޮތަކަށް ހުސެއިން ޖަލުން ދޫކޮށް އެހެންނަމަވެސް، އަލުން ހައްޔަރު ކުރިއެވެ.
އަލްޖަޒީރާ މީޑިއާ ނެޓްވާކުގެ ޑިރެކްޓަރ ޖެނެރަލް މުސްތަފާ ސޯގު ވިދާޅުވެގައިވަނީ، "ހައްދެއް ނެތްގޮތަށް ހުސެއިންގެ ބަންދުގެ މުއްދަތު އިތުރު ކުރަމުން ދިއުން ހުއްޓުމަކަށް އަންނަން ޖެހޭ ކަމަށާއި، އަދި އެއްވެސް ޝަރުތަކާ ނުލާ ހުސެން މިނިވަންވެސް ކުރަން ޖެހޭ،" ކަމަށެވެ.
"އަލްޖަޒީރާއިން އަބަދުވެސް، ހުރިހާ ނޫސްވެރިންގެ ހިމާޔަތުގައިވެސް ވަކާލާތު ކުރާނެ. އަހަރުމެން ގަބޫލު ކުރަނީ، އެއްވެސް ނޫސްވެރިޔަކަށް އޭނާގެ ވަޒީފާ އަދާކުރުމުގެ ސަބަބުން، ދައުވާކުރެވި، ޖަލަށްލެވި، އަނިޔާ ދެވިގެން ނުވާނެކަމަށް،" މުސްތަފާ ވިދާޅުވިއެވެ.
"އަހަރުމެން ގަބޫލު ކުރަނީ، ޑިމޮކްރަސިއާއި އިންސާނީ ހައްގުތަށް ނަގަހައްޓާ ދެމެހެއްޓުމުގެ ހަގީގީ ބިންގަލަކީ ނޫސްވެރިކަން ކަމަށް."
"ވަން ޕްރެސް ކޯލިޝަން" އިން އެކުލަވާލި، ދުނިޔޭގައި މިވަގުތު ތިބި، ނޫސްވެރިކަމުގެ ހައްގު ނިގުޅައިގަނެވި، އަދި އަނިޔާލިބެމުންދާ، އެންމެ ބޮޑަށް ސަމާލުކަން ޖޭހޭ 10 މީހުންގެ ލިސްޓުގެ 2 ވަނައިގައި މިއަހަރު މުހައްމަދު ހުސެއިން ވަނީ ހިމެނިފައެވެ.
އަދި މީގެ އިތުރުން، ދަ ނޭޝަނަލް އެސޯސިއޭޝަން އޮފް ބްލެކް ޖާނަލިސްޓް (NABJ)ގެ ފަރާތުން ހުސެއިންއަށް ވަނީ އެ ޖަމާއަތުން އަރުވާ ޝަރަފްވެރި ޕާސީ ކޫބޯޒާ އެވާޑްވެސް އަރުވާފައެވެ. މި އެވާރޑަކީ، ދުނިޔޭގެ ގައުމުތަކުގައި، ނޫސްވެރިން ކުރާ އާދަޔާ ޚިލާފު އަދި ނުރައްކާތެރި މައްސައްކަތްތަކުގެ އަގުވަޒަންކޮށް ކޮންމެ އަހަރަކުވެސް ދެމުން އަންނަ އެވާރޑެކެވެ.
ކޮމިޓީ އޮފް ޕްރޮޓެސްޓް ޖާނަލިސްޓުގެ ފަރާތުން 2020 ވަނަ އަހަރު ތައްޔާރު ކުރި ރިޕޯޓުގައިވާ ގޮތުން، މިސްރުގެ ސަރުކާރުންވަނީ، ނޫސްވެރިން ތުހުމަތަކާ ނުލާ ހައްޔަރުކުރުމާ، ދައުވާ ކުރުމަކާނުލާ ބަންދުކޮށްފައި ބޭތިއްބުން އިތުރަށް ވަރުގަދަ ކޮށްފައެވެ.
މިގޮތުން މިސްރުގެ ސަރުކާރުން މިވަގުތު އެގައުމުގެ ޖަލުތަކުގައި ޖުމްލަ 27 ނޫސްވެރިޔަކު ބަންދު ކޮށްފައި އެބަތިއްވެ. މިއީ 2016 ވަނަ އަހަރު އެގައުމުން ހައްޔަރުކުރިން ނޫސްވެރިންގެ ރެކޯޑް އަދަދާ އެއްވަރު އަދަދެކެވެ.
