ބޮލީވުޑްގެ ހޮރޯ ކޮމެޑީ ފިލްމު ސީރީޒް "ބޫލް ބުލައްޔާ"ގެ ތިންވަނަ ފިލްމުގައި، ޕާކިސްތާންގެ ތަރި، ފަވާދު ޚާންގެ ހާއްސަ ފެނިލުމެއް ހިމެނޭނެ ކަމަށް ރިޕޯޓްތައް ބުނެފި އެވެ.
މި އަހަރުގެ ނޮވެމްބަރުގައި ރިލީޒް ކުރަން ހަމަޖެހިފައިވާ އެ ފިލްމުގައި އޭނާ ފެންނާނީ ބަތަލާ ވިދިއާ ބަލަންގެ ލޯބިވެރިޔާގެ ގޮތުގައި ކަމަށް ވެއެވެ. ނަމަވެސް އަނީސް ބަޒްމީ ޑައިރެކްޓްކުރާ މި ހޮރޯ-ކޮމެޑީގައި ފަވާދު ހިމެނޭނެ ކަމެއް ފިލްމުގެ ޓީމުން އަދި ކަށަވަރުކޮށް ދީފައެއް ނުވެ އެވެ.
"ބޫލް ބުލައްޔާ"ގެ ފުރަތަމަ ދެ ފިލްމަށް ލިބުނު ތަރުހީބު ބޮޑުވުމާ އެކު އެ ފިލްމުގެ އުފެއްދުންތެރިން ކަމަށްވާ އަނީސް ބަޒްމީ އާއި ބުޝަން ކުމާރް ވަނީ ތިންވަނަ ފިލްމެއް ގެނެސްދޭން ތައްޔާރުވެފައިއެވެ.
ވިދްޔާ އަކީ "ބޫލް ބުލައްޔާ"ގެ ފުރަތަމަ ފިލްމުގައި މި ފިލްމުގައި ފެންނަ ޖިންނި، މޮންޖުލިކާގެ ރޯލު ކުޅުނު އެކްޓްރެސް އެވެ. އަދި ތިންވަނަ ފިލްމުގައި ވެސް އޭނާ އެ ރޯލު ކުޅޭ ގޮތަށް މިހާރު ވަނީ ހަމަޖައްސައިފަ އެވެ.
ދެވަނަ ފިލްމުގައި ލީޑު އެކްޓަރުގެ ރޯލު ކުޅުނު ކާތިކް އަރްޔަން ތިންވަނަ ފިލްމުގައި ވެސް އުޅޭނެއިރު، ހާއްސަ ރޯލަކުން މަދޫރީ ވެސް ފެންނާނެ އެވެ. އަދި މުހިންމު ރޯލަކުން ތްރިޕްތީ ދިމްރީ ވެސް ފެންނާނެ އެވެ.
ރިޕޯޓްތައް ބުނި ގޮތުގައި، އެ ފިލްމުގައި މަދޫރީ އާއި ވިދްޔާގެ ހާއްސަ ނެށުމެއް ގެނެސްދޭނެ އެވެ.
