ބަގްލަދޭޝްގެ ވެރިރަށް ޑާކާއަށް މިއަދު ދަތުރުކުރަން އޮތް މޯލްޑިވިއަންގެ ބޮޑު ބޯޓަށް ޓެކްނިކަލް މައްސަލައެއް ދިމާވެގެން، ދަތުރު ކެންސަލް ކޮށްފިއެވެ.
މޯލްޑިއަންކުރި އެކްސް ޕޯސްޓެއްގައި ބުނެފައިވަނީ ބަންގްލަދޭޝްގެ ވެރިރަށް ޑާކާއަށް ދަތުރުކުރަން އޮތް Q2-502 އަދި Q2-2502 މަރުކާގެ ފްލައިޓުގައި ކަމުގައެވެ. މި ބޯޓު މާލެއިން ޑާކާއަށް ދިއުމަށް ހަމަޖެހިފައި އޮތީ މިއަދު ހެނދުނު 9:25ގައި އާއި އަދި މިރޭ 7:35ގައި ކަމުގައެވެ.
މޯލްޑިވިއަންއިން ބުނެފައިވަނީ މި ދަތުރުތައް ކެންސަލް ވުމުގެ ސަބަބުން ކަސްޓަމަރުންގެ ކިބައިން މާފަށް އެދޭ ކަމަށާއި، ކަސްޓަމަރުން އެހީތެރިކަން ބޭނުންވާނަމަ 1671 އަށް ފޯން ކުރުމަށް ނުވަތަ އީމެއިލް ކުރުމަށެވެ.
އެނގިފައިވާ ގޮތުގައި މި ބޯޓަކީ މިދިޔަ ޖޫން މަހުގެ ތެރޭގައި ޓްރިވެންޑްރަމަށް ދަތުރުކުރަނިކޮށް ފާހަގަކުރެވުނު ޓެކްނިކަލް މައްސަލައަކާ ގުޅިގެން ސާވިސް ކުރަމުންދާ ބޯޓެކެވެ. އަދި މި ދަތުރު ކެންސަލް ކޮށްފައި ވަނީ، ސާވިސްއަށް ފަހު ޓެސްޓުކުރިއިރު، އިތުރު ޓެކްނިކަލް މައްސަލައެއް އުޅޭކަން ފާހަގަކުރެވިގެން ކަމަށްވެސް އެނގިފައި ވެއެވެ.
