އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު، ޗައިނާ އަށް ކުރެއްވި ދަތުރަށް ފަހު މާލެ ވަޑައިގެންފިއެވެ.
ޝަހީމް ޗައިނާ އަށް ވަޑައިގެންނެވީ ޗައިނާގެ ސިންޖިއަންގ ރީޖަންގެ އުރުމްގީގައި ބޭއްވުމަށް ހަމަޖެހިފައިވާ ޗައިނާ-ޔޫރޭޝިއާ އެކްސްޕޯގައި ބައިވެރިވެވަޑައިގަތުމަށެވެ.
ޗައިނާގެ މުހިންމު މިސްކިތްތަކާއި އިސްލާމީ އެކަޑަމީ ތަކަށް ވަޒީރު ވަނީ ޒިޔާރަތް ކުރައްވައިފައެވެ. މި ދަތުރުފުޅުގައި ވަޒީރުގެ އަރިހުގައި ވުޒާރާގެ ސްޓޭޓް މިނިސްޓަރ ޑރ. މުޙައްމަދު ޝުޖާއު އަބްދުލް ހަކީމްވެސް ބައިވެރިވެވަޑައިގެންނެވިއެވެ.
ސަރުކާރުގެ ތިން ވަޒީރަކު މިހާރު ވެސް ތިއްބެވީ އެކި ފޯރަމްތަކުގައި ބައިވެރިވެވަޑައިގަތުމަށް ޗައިނާގައެވެ. އެއީ އިކޮނޮމިކް މިނިސްޓަރު މުހައްމަދު ސައީދާއި، ހެލްތު މިނިސްޓަރު ޑރ. އަބްދުﷲ ހަލީލާއި ސިޓީތަކާއި އިދާރީ ދައިރާތައް ހިންގުމާއި އާންމު މަސައްކަތްތަކާއިބެހޭ ވަޒީރު އާދަމް ޝަރީފްއެވެ.
ވަޒީރު އާދަމް ޝަރީފް ޗައިނާއަށް ފުރާވަޑައިގެންނެވީ ޗައިނާގައި 5 ޖީގެ މޯބައިލް ހިދުމަތް ފޯރުކޮށްދިނުމުގެ އެންމެ ކުރިއަރާފައިވާ ފަރާތްތަކާއި ބައްދަލުކުރައްވައި މަޝްވަރާ ކުރެއްވުމަށެވެ. އަދި ވަޒީރު ސައީދު ޗައިނާގެ ޑާލިއަންގައި ބާއްވާ ވޯލްޑް އިކޮނޮމިކް ފޯރަމްގައި ބައިވެރިވެވަޑައިގަތުމަށެވެ. ހަލީލް ޗައިނާއަށް ފުރާވަޑައިގެންނެވީ 2024 ވަނަ އަހަރުގެ ޝަންހާއީ ކޯޕަރޭޝަން އޯގަނައިޒޭޝަން ފޯރަމް އޮން ޓްރެޑިޝަނަލް މެޑިސިންގައި ބައިވެރިވެވަޑައިގަތުމަށެވެ.
