ކުދި ގައުމުތަކުގެ ހައްގުގައި ރާއްޖެ އިން ބައިނަލްއަގުވާމީ ދުނިޔޭގައި ވަކާލާތު ކުރަމުންދާތީ އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ތައުރީފް ކުރައްވައިފިއެވެ.
ފޮރިން މިނިސްޓަރު މޫސާ ޒަމީރު، އެމެރިކާ އަށް މިހާރު ކުރައްވަމުން ގެންދަވާ ދަތުރުފުޅުގައި އެމަނިކުފާނު ވަނީ ގުޓަރޭސްއާ ބައްދަލު ކުރައްވައިފައެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ ޒަމީރު، ގުޓެރޭސްއާ އެކީގައި ބޭއްވެވި ބައްދަލުވުމުގައި މަޝްވަރާ ކުރެއްވި ކަންކަމުގެ ތެރޭގައި ދާދި ފަހުން ބޭއްވި ހަތަރު ވަނަ ސްމޯލް އައިލެންޑް ޑިވެލޮޕްމަންޓް ސްޓޭޓްސް (ސިޑްސް) ގައި އެއްބަސްވެވުނު ކަންތައްތައް ވީ އެންމެ އަވަހަކަށް ތަންފީޒުކުރުމާ ގުޅޭ ގޮތުން ބޭއްވި މަޝްވަރާތައް ހިމެނޭ ކަމަށެވެ.
ކުދި ގައުމުތަކުގެ ތަރައްގީގެ ލަނޑުދަނޑިތައް ހާސިލުކުރުމުގައި އދ. ގެ ފުރިހަމަ އެހީތެރިކަން ލިބޭނެކަމުގެ ޔަގީންކަން ގުޓެރޭސް ދެއްވި ކަމަށް ވެސް ފޮރިން މިނިސްޓްރީގެ ބަޔާނުގައިވެއެވެ.
ގުޓެރޭސް ވަނީ މޫސުމީ ބަދަލުތަކުން ކުރާ ނޭދެވޭ އަސަރުތަކާ ދެކޮޅަށް ކުދި ޖަޒީރާ ގައުމުތަކަށް މާލީ އެހީތެރިކަން ހޯދައި ދިނުމަށް ބައިނަލްއަގުވާމީ މައިދާނުގައި ރާއްޖެ އިން އިސްވެ ކުރަމުންދާ ވަކާލާތު ފާހަގަކުރައްވައި، އެ މަސައްކަތަށް ތައުރީފު ކުރައްވައިފައެވެ.
ޒަމީރު އެމެރިކާއަށް ކުރައްވަމުން ގެންދަވާ ދަތުރުފުޅުގައި މިއަދު ވަނީ އދ.ގެ ބައެއް އިސްވެރިންނާއި ސަފީރުންގެ އިތުރުން އެ ސިޓީ އާއި ނިއު ޖާޒީގައި ދިރިއުޅޭ ދިވެހިންނާ ވެސް ބައްދަލުކުރައްވައިފައެވެ. ރާއްޖޭގެ ޓޫރިޒަމް ފުޅާކުރުމާ ގުޅޭގޮތުން އެ ސިޓީގެ އިސް ޓުއާ އޮޕަރޭޓަރުންނާއި ޓްރެވަލް އެޑްވައިޒަރުންނާ މިނިސްޓަރު ވަނީ ބައްދަލުކުރައްވައި، އެ ކަމުގެ މަޝްވަރާތައް ކުރައްވައިފައެވެ.
