ދައުލަތުގެ ހަރަދު ކުޑަ ކުރުމަށް ރައްޔިތުންގެ މަޖިލިހުގެ މެމްބަރުންގެ އިންޝުއަރެންސް މިހާރުން މިހާރަށް ކަނޑާލަން ތާއީދު ކުރައްވާ ކަމަށް ރައްޔިތުންގެ މަޖިލިހުގެ އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު "އެކްސް" ގައި ކުރެއްވި ޕޯސްޓެއްގައި ވިދާޅުވީ ދައުލަތުގެ ހަރަދު ކުޑަކުރުމަށް ރައީސް ޑރ، މުހައްމަދު މުއިއްޒު ފައްޓަވާފައިވާ ގައުމީ މަސައްކަތަށް އެއްބާރުލުން ދެއްވުމުގެ ގޮތުން މަޖިލިސް މެމްބަރުންގެ އިންޝުއަރެންސް މިހާރުން މިހާރަށް ކަނޑާލައި ދިވެހި ރައްޔިތުންނަށް ލިބޭ އާސަންދަ އެކަނި ލިބޭ ގޮތަށް ބަދަލު ކުރަައްވަން ފުރިހަމަ އަށް ތާއީދު ކުރައްވާ ކަމަށެވެ.
ޕީއެންސީން ރޭ ބޭއްވި ހަރުގެ ޖަލްސާގައި ޝުޖާއު ވިދާޅުވީ ރާއްޖޭގެ މާލީ ހާލަތު އޮތީ ގޯސްކޮށް ކަމަށާއި ދައުލަތުގެ ހަރަދު ކުޑަކުރަން، އާސަންދަ ދޭ ގޮތާއި ސަބްސިޑީ ދޭ އުސޫލު ބަދަލުކުރަން ޖެހޭ ކަމަށެވެ. ޝުޖާއު ވިދާޅުވީ އަންނަން އޮތް ޖީލުގެ ހައްގުގައި ކުރަންޖެހޭ މަސައްކަތްތަކެއް އެބަހުރި ކަމަށާއި އޭގެ ތެރޭގައި ދައުލަތުން ކުރާ ބޭކާރު ހަރަދުތައް ކުޑަކުރަން ޖެހޭ ކަމަށެވެ.
އޭގެ ތެރޭގައި، އާސަންދަ އެ ލިބެންޖެހޭ ހައްގު ފަރާތްތަކަށް އެކަނި ދޭން ޖެހޭ ކަމަށް ވިދާޅުވި އެވެ. އޭނާ ވިދާޅުވީ ސަބްސިޑީ ވެސް އެ ލިބެންޖެހޭ ފަރާތްތަކަށް އެކަނި ދޭ ގޮތަށް ހަދަން ޖެހޭ ކަމަށް އޭނާ ވިދާޅުވިއެވެ.
"އެއްވެސް ކަމެއް އޮޅުވާލައިގެން ނުދައްކާނަން. ދިވެހި ދައުލަތުގެ މިއަދުގެ ހާލަތަކީ އަޅުގަނޑުމެންނަކީ ވަރަށް ގިނަ އަދަދެއްގެ ބޭކާރު ހޭދަކުރާ ބައެއް. އެއް ކަމަކަށް ނަޒަރު ހިންގާލާއިރު އާސަންދައިގެ ވާހަކައިގެ. އެންމެ ބޮޑަށް ލިބޭ ޝަކުވާއަކީ އާސަންދަގެ ބޭނުން ނަހަމަ ގޮތުގައި އެބަ ހިފައޭ،" ޝުޖާއު ވިދާޅުވިއެވެ.
ކުރީގެ ސަރުކާރުން އޮތީ ދައުލަތް ދަރުވާލައި، ސަރުކާރު ކުންފުނިތައް ވެސް އިނދަޖައްސާލާފައި ކަމަށް ޝުޖާއު ވިދާޅުވިއެވެ. އެ ދަތި ހާލަތުން އަރައިގަތުމަށް މި ސަރުކާރުން ގިނަ މަސައްކަތްތަކެއް ކުރަމުންދާ ކަމަށް އޭނާ ވިދާޅުވިއެވެ.
