ފެނަކަ ކޯޕަރޭޝަންގެ ކޮރަޕްޝަންގެ މައްސަލަތައް ބެލުމަށް ގޮވާލައި ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ރައްޔިތުންގެ މަޖިލީހުގެ ބުދަ ދުވަހުގެ ޖަލްސާއަށް ކުއްލި މައްސަލައެއް ހުށަހަޅައިފި އެވެ.
ކުރީގެ ސަރުކާރުގައި ފެނަކަ ކޯޕަރޭޝަންގެ މައްޗަށް ކޮރަޕްޝަންގެ ބޮޑެތި ތުހުމަތުތަކެއް ކުރެވުނު ނަމަވެސް އެ ކޯޕަރޭޝަންގެ ސީނިއާ މެނޭޖްމަންޓުން އޭރު ވަނީ އެކަން ދޮގުކޮށްފަ އެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ޕީއެންސީގެ ފޭދޫ ދެކުނު ދާއިރާގެ މެމްބަރު އިބްރާހިމް ދީދީ ކުއްލި މައްސަލައެއް ހުށަހެޅުއްވީ ޔޫޓިލިޓީ ޕްރޮވައިޑަރުގެ ކޮރަޕްޝަންގެ މައްސަލަ ވަގުތުން ތަހުގީގު ކޮށްދިނުމަށް އެދިއެވެ. އެ ގަރާރު މިއަދުގެ ޖަލްސާގައި ބަލައިގަތީ 67 މެންބަރުންގެ އިއްތިފާގުންނެވެ.
ދީދީ ހުށަހެޅުއްވި ގަރާރުގައި ވިދާޅުވެފައިވަނީ ފެނަކަ ކޯޕަރޭޝަންގެ އިސްވެރިންގެ މައްޗަށް ކުރީގެ ސަރުކާރުތަކުގައި ކޮރަޕްޝަންގެ ގިނަ އަމަލުތަކެއް ހިންގާފައިވާ ކަމަށް ތުހުމަތު ކުރެވޭ ކަމަށާއި އެކަމުގެ ސަބަބުން ކަސްޓަމަރުންނަށް ފޯރުކޮށްދޭ ހިދުމަތްތަކަށް ހުރަސް އެޅިފައިވާ ކަމަށެވެ. އަދި ކުއްލި މައްސަލަ ހުށަހެޅީ އެ މައްސަލަ ދައުލަތުގެ ސަމާލުކަމަށް ގެނައުމަށާއި ކޮރަޕްޝަންގެ ތުހުމަތުތަކާ ގުޅިގެން ދައުލަތުން އަޅަން ނިންމާފައިވާ ޕްލޭން އޮޅުންފިލުވުމަށް ކަމަށް ވެސް އޭނާ ވިދާޅުވި އެވެ.
މެމްބަރު ވިދާޅުވީ ފެނަކައަކީ ކޮރަޕްޝަންގެ ތެރެއަށް ވަރަށް ބޮޑަށް ވަދެފައިވާ ކުންފުންޏެއް ކަމަށާއި، ކުރީ ސަރުކާރުގައި ފެނަކަ އޮތީ ދަރަނީގެ ދަރަނީގެ ތެރެއަށް ވެއްޓިފައި ކަމަށެވެ. ދީދީ ވިދާޅުވީ އެ ކޯޕަރޭޝަނަށް ފައިސާ އިންޖެކްޓް ކުރަން ޖެހުމުން ދައުލަތަށް ގެއްލުމެއް ލިބުނު ކަމަށެވެ. "އެއީ ހަމައެކަނި އެއް ކުންފުންޏެއްގެ [އަޅުގަނޑުމެން މި ދައްކަނީ] ކަމެއް ނޫން، ރޯޑް [ޑިވެލޮޕްމަންޓް] ކޯޕަރޭޝަނަށް ވެސް ހަމަ އެގޮތަށް، ފެނަކަ އިން އެސްޓީއޯ އަށް ދެ ބިލިއަން ރުފިޔާ ދައްކަން ޖެހޭ އިރު، 2019 ވަނަ އަހަރުން ފެށިގެން މިހާތަނަށް އެންމެ ޕޭމަންޓެއް ވެސް ދޫކޮށްފައެއް ނުވޭ،" ދީދީ ވިދާޅުވި އެވެ.
މެމްބަރު އިތުރަށް ވިދާޅުވީ ފެނަކަ ކޯޕަރޭޝަންގެ ކުރީގެ މެނޭޖްމަންޓަކީ ކޮރަޕްޝަނަށް ކުށްވެރިވާ ފަރާތެއް ކަމަށާއި ޖަވާބުދާރީވާން ޖެހޭ ކަމަށެވެ. އަދި ފެނަކައިގެ ކުރީގެ މެނޭޖިން ޑިރެކްޓަރު އަހުމަދު ސައީދު މަޖިލީހަށް ހާޒިރު ކުރުމަށްވެސް ވަނީ ގޮވާލައްވާފަ އެވެ. "ފެނަކައަށް މިވަގުތު ކުރިމަތިވެފައިވާ ހީނަރުކަމަކީ ކުރީގެ އެމްޑީއާ އެކު މަސައްކަތް ކުރި ޓޮޕް މެނޭޖްމަންޓުގެ ޒިންމާދާރުކަން ކުޑަކަމުން، އެކަން ބަލަން ޖެހޭ،" އޭނާ ވިދާޅުވި އެވެ.
އެ ގަރާރަށް ބަހުސް ކުރެއްވި ޕީއެންސީގެ އެހެން މެންބަރުން ވެސް ވަނީ ފެނަކައިގެ ކޮރަޕްޝަންގެ މައްސަލަތައް ބެލުމަށް ގޮވާލާފައެވެ.
