މަސްވެެރިންނާއި އެހެނިހެން މަސްވެރިން އަތުން ގަނެފައިވާ މަހަށް ނުދައްކާހުރި ފައިސާ ދައްކާ ޚަލާސް ކުރުމަށް ސަރުކާރަށް އެމްޑީޕީގެ ރައީސް އަބުދުﷲ ޝާހިދު ގޮވާލައްވައިފިއެވެ.

ފައިސާ ނުލިބިގެން މަސްވެރިން ކުރަމުންދާ މުޒާހިރާއާއި ގުޅިގެން އައްޑޫ ފިޝަރީޒް ކޮމްޕްލެކްސް އޮޕަރޭޝަންތަކަށް ހުރަސް އަޅާ، މަސްވެރިން އައްޑޫ ސިޓީގައި ކުރަމުންދާ މުޒާހިރާއާއި ގުޅޭގޮތުން ޝާހިދު ކުރެއްވި އެކްސް ޕޯސްޓެއްގައި ޝާހިދު ވިދާޅުވީ ބަޔަކުއަތުން އެއްޗެއް ގަނެފިއްޔާ އެއެއްޗެއްގެ އަގު އަދާކުރުމަކީ ގަންނަ ބައެއްގެ ވާޖިބެއް ކަމުގައެވެ. އަދި އެއީ އެއެއްޗެއް ގަންނަ ބައެއްގެ ހެޔޮކަމުން ނުވަތަ ދީލަތިކަމުން ކުރަންޖެހޭކަމެއްނޫންކަމަށްވެސް ޝާހިދު ވިދާޅުވިއެވެ.

މަސްވެރިންގެ އަތުން ސަރުކާރުން މަސްގަނެފައި ފައިސާ ނުދައްކާނަމަ އެއީ ގޯހެއް. އޭގައި ދެއްކޭނެ ބަހަނާއެއް ނެތް. އައްޑޫ މަސްވެެރިންނާއި އެހެނިހެން މަސްވެރިން އަތުން ގަނެފައިވާ މަހަށް ނުދައްކާހުރި ފައިސާ ދައްކާ ޚަލާސް ކުރުމަށްސަރުކާރަށް ގޮވާލަން.

ޝާހިދުގެ އެކްސް ޕޯސްޓުގައި ވިދާޅުވިއެވެ.

މަސްވެރިން އައްޑޫ ސިޓީގައި ކުރަމުންދާ މުޒާހިރާއާއި ގުޅޭގޮތުން ފުލުހުން ރޭ ނެރުނު ނޫސް ބަޔާނެއްގައި ވިދާޅުވީ މަސްވެރިން އައްޑޫ ސިޓީގައި ކުރަމުންދާ އިހުތިޖާޖު، ސުލްހަވެރިކަމާއެކު ގާނޫނީ އިމުގެ ތެރެއިން ކުރިޔަށް ގެންދިއުމުގެ ފުރުސަތު ދެމުންދާ ކަމަށާއި، މި އިހުތިޖާޖާ ގުޅިގެން މިފްކޯގެ އައްޑޫ ފިޝަރީޒް ކޮމްޕްލެކްސްގެ އޮޕަރޭޝަންތަކަށް ހުރަސްއެޅިފައިވުމާއެކު އެ އޮޕަރޭޝަންތައް އަލުން ފެށޭނެ މާހައުލެއް އުފެއްދުމަށްވެސް ދިވެހި ފުލުހުން މަސައްކަތް ކުރަމުންދާ ކަމުގައެވެ.

އަދި  ފުލުހުން އަމަން ގާއިމްކޮށް ރައްކާތެރިކަން ކަށަވަރުކުރުމަށް އަޅާ ފިޔަވަޅުތަކަށް މަސްވެރިންގެ ފަރާތުން އެއްބާރުލުންދީ ގާނޫނާއި ގަވާއިދާ ޚިލާފު އަމަލެއް ނުކުރުމަށް މަސްވެރިންގެ ކިބައިން ފުލުހުންގެ ބަޔާނުގައި އެދިފައި ވެއެވެ.

އަދި އިހުތުޖާޖު ކުރުމުގައި ޚިޔާލުފާޅުކުރުމުގެ މިނިވަންކަން ބޭނުން ކުރުމުގައި އެއްވެ އުޅުމާއި ޚިޔާލުފާޅުކުރުމުގެ މިނިވަންކަމުގެ ގާނޫނާއި އަދި އެހެނިގެން ގާނޫނުތަކާއި ގަވާއިދުތަކުގެ ހުދޫދުގެ ތެރެއިން މަސްވެރިންގެ ކަންބޮޑުވުންތަކާއި ޝުއޫރުތައް ފާޅުކުރުމުގައި ފުލުހުންގެ ފަރާތުން ސެކިއުރިޓީ ލައިން ގާއިމްކޮށް މަސްވެރިންނަށް ދޭންޖެހޭ އެއްބާރުލުން ދޭނެކަމުގައިވެސް ފުލުހުން ވިދާޅުވެފައި ވެއެވެ.

އެގޮތުން ކުރިޔަށް ގެންދާ އިހުތިޖާޖުތަކުގައި ގާނޫނާއި ގަވާއިދުތަކަށް ހުރުމަތްތެރިކޮށް ހިތައި އާންމު މަސްލަހަތު އިސްކުުރުމަށްވެސް މަސްވެރިންނަށް ފުލުހުން އިލްތިމާސް ކޮށްފައި ވެއެވެ.

މަސްވެރިން ބާނާ މަހަށް ފައިސާ ނުލިބިގެން ހުޅުމީދޫގައި މަސްވެރިން ކުރާ މުޒާހިރާ މެދު ނުކެނޑި އަދިވެސް މަސްވެރިން ގެންދަނީ ކުރިޔަށް ގެންދަމުންނެވެ. މަސްވެރިން މުޒާހިރާ ކުރަމުންދަނީ އައްޑޫ މިފްކޯ ބަނދަރުގައެވެ. އަދި މި ސަރަހައްދުގައި 80 ވަރަކަށް މަސްއވެރިން މުޒާހިރާ ކުރަމުންދާ ކަމަށްވެސް ވަނީ މައުލޫމާތު ލިބިފައެވެ.

މިފްކޯގެ އައްޑޫ ސިޓީ ބަނދަރުގައި މަސްވެރިން އިއްޔެ ފެށި އިހުތިޖާޖާއި ގުޅޭގޮތުން އަދި މިހާތަނަށްވެސް އެކަށީގެންވާ ޖަވާބެއް ލިބިފައި ނުވާތީ މަސް ފެކްޓަރީގެ ހުރިހާ ސީނިއާ މުވައްޒަފުން ފެކްޓްރީން ބޭރުކޮށް މަސް ކެއްކުމަށް ހުރަސް އަޅާނެކަމުގެ އިންޒާރު މަސްވެރިން ދީފައިވާކަމަށް ފުލުހުން ބުނެފައި ވެއެވެ.

މި މުޒާހިރާއާއި ގުޅިގެން ފިޝަރީޒް މިނިސްޓަރޔ އަހުމަދު ޝިޔާމް ވިދާޅުވީ އައްޑޫ ފިޝަރީޒް ކޮމްޕްލެކްސް ސަރަހައްދުގައި ކުރިޔަށްދާ އިހުތިޖާޖު ފެށުމުގެ ކުރިންވެސް އަދި މިހާރުވެސް ސަރުކާރުން ދަނީ ވަރަށް ގާތުން ބަލަމުން އަޑުއަހަމުން އަދި އެކަމުގައި މިފްކޯ އަދި ސަރުކާރުން ކުރަމުންދާ މަސައްކަތުގެ ތަފްސީލުވެސް މަސްވެރިންނާއި ހިއްސާކުރަމުންދާ ކަމުގައެވެ.

ފާއިތުވި ދޮޅުމަހެއްހާ ދުވަހު މަސްވެރިން މިފްކޯއަށް ކުރުވާފައިވާކަމަށް 80 މިލިއަން ރުފިޔާ އެކުންފުނިން މަސްވެރިންނަށް ދޭން ޖެހެއެވެ. އޭގެ ތެރެއިން މިފްކާއިން ފާއިތުވެދިޔަމަހުގެ ތެރޭގައި މިފްކޯއިންވަނީ މަސްވެރިންނަށް ދައްކާފައެވެ.

މަސްވެރިންނަށް ފައިސާ ނުލިބިގެން ބޮޑުކަންނެލި މަސްވެރިންގެ ޔޫނިއަނުންއިންވެސް މިމަހުގެ 12 ވަނަ ދުވަހު މާލޭގައި މުޒާހިރާ ކޮށްފައި ވެއެވެ. އެހެންނަމަވެސް މުޒާހިރާ ހުއްޓާލީ މަސްވެރިނަށް ވިއްކާ ތެލުގެ އަގު ސަރުކާރުން ދަށް ކުރުމުންނެވެ.