މިހާރު މައްކާއަށް ގޮސްފައިވާ ހުރިހާ ހައްޖާޖީންގެ ހާލުވެސް ރަގަޅު ކަމަށާއި، މިހާތަނަށް ލިބިފައިވާ މައުލޫމާތަށް ބަލާއިރި ހުރިހާ ކަމެއްވެސް ދަނީ އިންތިޒާމްތަކާ އެއްގޮތަށް ކަމުގައި އަމީރުލް ޙައްޖެއްގެ ގޮތުގައި މިއަަދު މައްކާއަށް ފުރާވަޑައިގެންނެވި ތަޢުލީމާބެހޭ ވުޒާރާގެ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ.
ހައްޖަށް ފުރާ ވަޑައިގަތުމުގެ ކުރިން މިއަދި ދެއްވި އިންޓަވިއުއެއްގައި އޭނާ ވިދާޅުވީ މިއީ ފަހަކަށް އައިސް އެންމެ ގިނަ އަދަދެއްގެ ދިވެހި ރައްޔިތުން ހައްޖަށް ދާ ފަހަރުކަމަށާއި، ހައްޖާޖީންގެ މައުލޫމާތު ދޭތެރެ ދޭތެރެއިން ރައްޔިތުންނާއި ހަމައަށް ފޯރުކޮށް ދެމުންދާނެ ކަމަށް އޭނާ ވިދާޅުވިއެވެ.
ޢަމީރުލް ޙައްޖުގެ ގޮތުގެ ގޮތުގައި ފުރާވަޑައިގެންނެވުމުގެ ކުރިން ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި ހުންވައި ދެއްވި ބަސްދީގަތުމެއްގައި ވަޒީރު ވިދާޅުވީ، މިހާތަނަށް ލިބިފައިވާ މަޢުލޫމާތަށް ބަލާއިރު ދިވެހި ހުރިހާ ޙައްޖާޖީންގެ ހާލުވެސް ރަނގަޅުކަމަށެވެ. އަދި ޙައްޖުވެރިންގެ ކަންކަން ވަނީ އިސްލާމިކް މިނިސްޓްރީއާއި ޙައްޖު ކޯޕަރޭޝަން ގުޅިގެން ވަރަށް ފުރިހަމައަށް އިންތިޒާމްކުރެވިފައިކަމަށެވެ.
ދިވެހި ދައުލަތުގެ ފަރާތުން ޙައްޖުގައި ރާއްޖެ ތަމްސީލްކުރާ އިސްބޭފުޅެއްގެ ގޮތުގައި، އަދި ރާއްޖޭގެ ހައްޖާޖީންގެ އިސް ބޭފުޅެއްގެ ގޮތުގައި ކޮންމެ އަހަރަކު ވެސް ކަނޑައަޅާ އަމީރުލްހައްޖުގެ ކަނޑައަޅުއްވަނީ ރައީސުލްޖުމްހޫރިއްޔާ އެވެ.
އަމީރުލް ޙައްޖުގެ ހައިސިއްޔަތުން ދިވެހި ޙައްޖުވެރިންގެ އެންމެހާ ކަންކަން ބަލަހައްޓަވާނީ ޑރ. ޝަފީޢުގެ ބެއްލެވުމުގެ ދަށުންނެވެ.
މިއަހަރުގެ ޢަމީރުލް ޙައްޖު ތަޢުލީމީ ވުޒާރާގެ ވަޒީރު، ޑރ. ޝަފީއު ޙައްޖުގެ އަޅުކަން އަދާކުރެއްވުމަށް މައްކާއަށް މިއަދު ފުރާވަޑައިގެންފައިވާއިރު، އޭނާ ފުރާވަޑައިގެންނެވީ މިއަދު ހަވީރު ސައުދީ އެއާލައިންގެ ފްލައިޓެއްގައި ދިވެހި ޙައްޖުވެރިންގެ ފަހު ގުރޫޕާއެކުއެވެ.
މި އަހަރު ރާއްޖެއިން ހައްޖަށް ދާ މީހުން ފުރާފައި ވަނީ ހަތަރު ގްރޫޕަކަށެވެ. ފުރަތަމަ ގްރޫޕް 31 މެއި 2024 ގައި ފިރާފައިވާއިރު އެ ގްރޫޕްގައި 296 ހައްޖާޖީން ވަނީ މައްކާއަށް ގޮސްފައެވެ. ޖޫން 3 ގައި ފުރި ދެވަނަ ގްރޫޕްގައި 354 ހައްޖާޖީން ފުރިއެވެ. އަދި ބާކީ ތިބި ހައްޖުވެރިން ފުރާފައި ވަނީ ޖޫން 7 ވަނަ ދުވަހާއި މިއަދު އެވެ.
މީގެ އިތުރުން މިފަހަރު ރާއްޖެ އަށް ލިބުނު ހައްޖު ކޯޓާ އިން، ފަގީރުންގެ ދަފްތަރުގައި ހިމެނޭ 50 މީހުންނަށް ސަރުކާރުގެ ޚަރަދުގައި ޙައްޖުވުމުގެ ފުރުޞަތު ވަނީ ދީފައެވެ. އެމީހުން ފުރީ ޖޫން 7 ގައެވެ.
މި އަހަރު ރާއްޖެއިން މީހުން ހައްޖަށް ގެންދިއުމުގެ ފުރުސަތު ލިބުނީ މިދިޔަ ދެ އަހަރެކޭ އެއްގޮތަށް ހައްޖު ކޯޕަރޭޝަނެވެ. ރާއްޖެ އަށް ލިބިފައިވާ ހައްޖު ކޯޓާގެ އަދަދަކީ 1000 އެވެ.
