ރާއްޖޭގެ އިގްތިސާދީ ހާލަތުގެ އަސްލު މަންޒަރު، ދައުލަތުގެ ފިނޭންސް މިނިސްޓަރު ވިޔަފާރިވެރިންނަށާއި ރައްޔިތުންނަށް ސާފިކޮށް ދިނުމަށް މޯލްޑިވްސް ޓްރޭޑް އެސޯސިއޭޝަން، (އެމްޓީއޭ)އިން ގޮވާލާއިފިއެވެ.
އެމްޓީއޭއިން ކުރި އެކްސް ޕޯސްޓެއްގައި ވިދާޅުވެފައިވަނީ ރައްޔިތުންގެ މަޖިލިހުގެ ނައިބު ރައީސް އަހުމަދު ނާޒިމް ރާއްޖޭގެ އިގްތިސާދީ ހާލަތާއި ގުޅޭގޮތުން ފާޅު ކުރެއްވި ކަންބޮޑުވުންތަކަކީ ވަރަށްވެސް ޖާއިޒް ކަންބޮޑުވުންތަކެއް ކަމުގައި މިޖަމިއްޔާއިން ދެކޭ ކަމަށެވެ.
އަދި ރާއްޖޭގެ ވިޔަފާރިވެރިންނަށާއި, އެންމެހާ ދިވެހި ރައްޔިތުންނަށްވެސް "ތެދުބަހުން ވަރަށް ތިލަކޮށް" ރާއްޖޭގެ އިގްތިސާދީ ހާލަތުގެ އަސްލު މަންޒަރު ފިނޭންސް މިނިސްޓަރު ސާފުކޮށްދެއްވުމަށް އެ ޖަމިއްޔާއިން ގޮވާލާކަމަށްވެސް އެމްޓީއޭގެ އެކްސް ޕޯސްޓުގައި ވިދާޅުވެފައި ވެއެވެ.
ރައްޔިތުންގެ މަޖިލިހުގެ ނައިބު ރައީސް އަހުމަދު ނާޒިމް ރާއްޖޭގެ އިގްތިސާދީ ހާލަތާއި ގުޅޭގޮތުން ފާޅު ކުރެއްވި ކަންބޮޑުވުންތަކަކީ ވަރަށްވެސް ޖާއިޒް ކަންބޮޑުވުންތަކެއް ކަމުގައި މިޖަމިއްޔާއިން ދެކެން.. 1/2
— Maldives Trade Association (@MTASecretariat) June 5, 2024
ރާއްޖޭގެ އިގްތިސާދީ ހާލަތުގެ އަސްލު މަންޒަރު ސާފުކޮށްދިނުމަށް އެމްޓީއޭއިން ގޮވާލާފައިވާއިރު، މާލިއްޔަތު ކޮމިޓީގައި ވާހަކަ ދައްކަވަމުން، ރާއްޖޭގެ އިގްތިސާދީ ހާލަތު އޮތްގޮތް ތިލަކޮށް ތެދުބަހުން ރައްޔިތުންނަށް ސާފުކޮށްދޭން ޖެހޭކަމަށް ރައްޔިތުންގެ މަޖިލިހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް ވަނީ ވިދާޅުވެފައެވެ.
މާލިއްޔަތު ކޮމިޓީގައި ވާހަކަ ދައްކަވަމުން ނާޒިމް ވިދާޅުވީ، ރައްޔިތުންގެ އުންމީދުތައް ބަހައްޓަންވީ މިންވަރާއި މަޖިލީހުގެ މެންބަރުން ވެސް ދާއިރާގެ ރައްޔިތުންނަށް އުންމީދުތައް ތަސައްވުރު ކޮށްދެވޭނެ ވަރު ސާފުކޮށްދެވޭނީ މާލީ ހާލަތު އޮތް ގޮތް ސާފުކޮށް ބުނެދިނުމުން ކަމަށެވެ.
ރާއްޖޭގެ ރައްޔިތުންނަށް ވަރަށް ތެދު ބަހުން، ވަރަށް ތިލަކޮށް މި ވާހަކަ ދެކެވެން އެބަ ޖެހޭ، ރައްޔިތުންގެ އެކްސްޕެކްޓޭޝަން ބަހައްޓަން އެނގޭނީ އެ ބޭފުޅުން ދައްކަވާ ވާހަކައެއްގެ މައްޗަށް، ރަށްރަށުގެ ރައްޔިތުންނަށް އެބަ އެނގެން ޖެހޭ، ޕްރޮޖެކްޓްތައް ހިނގާނެތޯ ނުވަތަ ނޫންތޯ ވެސް.
ނާޒިމް ވިދާޅުވި އެވެ.
ރާއްޖޭގެ އިގްތިސާދީ ހާލަތުގެ ކަންބޮޑުވުންތަކާއި ގުޅޭގޮތުން ވާހަކަ ދައްކަވަމުން ނާޒިމް ވިދާޅުވީ އިންތިޚާބުގެ މޫސުން ނިމިއްޖެ ކަމަށާއި، ހަގީގަތާއި ކުރިމަތިލާން ރައްޔިތުންގެ ގާތުގައި ބުނެދޭން ޖެހޭކަމުގައެވެ. އަދި ރިއަލިޓީއާއި ކޮންފްރޮންޓް ކުރަން ދަސްކުރަން ރައްޔިތުންގެ ގާތުގައި ބުނަންޖެހޭ ކަމުގައިވެސް ނާޒިމް ވިދާޅުވިއެވެ.
އަދި ނާޒިމް ވިދާޅުވީ ބޯންޖެހޭ ހިތި ބޭއްހެއްގެ ވާހަކަ ބޭސް ސިޓީގައި އޮތްނަމަ އެކަންވެސް އެގެންޖެހޭ ކަމަށާއި، ރައްޔިތުންގެ މަޖިލިހުން ކޮށްދޭންވީ ކޮންކަމެއްކަންވެސް އެގެންޖެހޭ ކަމުގައެވެ.
އެހެންވީމަ އަޅުގަނޑުމެން ވެސް ހިތިބޭސް، ބޭސް ސިޓީއެއް އޮތިއްޔާ އެވެސް އެނގެންވިއްޔޭ އަޅުގަނޑުމެންނަށް، އަޅުގަނޑުމެން ކޮށްދޭންވީ ކޮންކަމެއްތޯ، އޭގެ ބަދަލުގައި މިހެން ދަމުންދަމުން ގޮސް ބަނގުރޫޓު ވީމަކާ ކަމަކު ނުދާނެޔޭ.
އޭނާ ވިދާޅުވި އެވެ.
