ކޫލް ސްކޫލްތަކުގައި ބުލީ ނުކުރާނެކަމަށް ވިދާޅުވެ، ސްކޫލްތައް އޭސީކޮށް، ފިނިކުރުމަށް ކުރިޔަށް ގެންދާ މަޝްރޫއާއެކު ބުލީ ކުރުމުގެ މައްސަލައަށް ހައްލެއް އަންނާނެކަމަށް ވިދާޅުވެ ދެއްކެވި ވާހަކަ، އެޑިއުކޭޝަން މިނިސްޓަރ ޑރ. އިސްމާއިލް ޞްފީއު ދިފާއު ކުރައްވައިފިއެވެ.

މިމަހުގެ 2 ވަނަ ދުވަހު، މާފުށީ ސްކޫލްގައި ބޭއްވި ހާއްސަ ރަސްމިއްޔާތެއްގައި "ކޫލް ސްކޫލް" ޕްރޮޖެކްޓް ފައްޓަވައިދެއްވުމަށްފަހު، ވާހަކަފުޅުދައްކަވަމުން މިނިސްޓަރު އިސްމާއިލް ޝަފީއު ވިދާޅުވީ، "ކޫލް ސްކޫލް" ޕްރޮޖެކްޓް ފެއްޓެވީ ހަމައެކަނި ފިނިކޮށްލައިގެން ނިންމާލަން ނޫން ކަމަށެވެ.

އަދި އޭނާ ވިދާޅުވީ ސަރުކާރު ހުރިހާ ސްކޫލްތެއް އޭސީކޮށް ފިނިކުރުމަށް ފެށި "ކޫލް ސްކޫލް" ޕްރޮޖެކްޓްގެ ދަށުން ފިނިކުރާ، ކޫލް ސްކޫލެއްގައި ދަރިވަރުންގެ ސުލޫކާއި އުޅުމަށް ހެޔޮ ބަދަލުތަކެއް އަންނާނެ ކަމަށާއި ބުލީއެއް ނުކުރާނެ ކަމުގައެވެ.

ދަރިވަރުން ބުލީ ކުރުމާއި ފިނިހޫނުމިނާއި ބޮޑު ގުޅުމެއްވާކަމަށް މޭރުންކޮށް ޑރ. ޝަފީއު ދެއްކެވި ވާހަކަތަކަށް ގިނަ ބައެއްގެ ފާޑުކިއުން އަމާޒުވެފައިވަނީ، އޭނާގެ ފޭސްބުކް ޕޭޖުގައި ކުރެއްވި ޕޯސްޓެއްގައި އޭނާވަނީ އާންމުންގެ ފާޑުކިއުން އަމާޒުވި އޭނާގެ ވާހަކަ ދިފާއު ކޮށްފައެވެ.

އެގޮތުން އޭނާ ވިދާޅުވީ ކޫލް ސްކޫލް ތަކުގައި ބުލީ ނުކުރާނެކަމަށާއި، ބުލީ ކުރުމަކީ ކޫލް ކަމެއް ނޫން ކަމުގައެވެ. އަދި މިފަދަ ސްކޫލްތަކުގައި އެންމެން މަސައްކަތް ކުރާނީ ގުޅިގެން ދަރިވަރުންގެ ކުރިއެރުމަށްކަމަށް ވިދާޅުވަމުން އޭނާ ވިދާޅުވީ އެއީ އޭނާ އެދުވަހު ދެއްކި ވާހަކައިގައި ބަޔާންކުރި ކޫލް ސްކޫލްގެ މަފްހޫމު ކަމުގައެވެ.

ކޫލް ސްކޫލެއްގައި ބުލީ ނުކުރާނެއޭ އަޅުގަނޑު ބުނީމާ، އޭގެ ބަދަލުގައި ސްކޫލްތައް އޭސީކުރީމާ ބުލީ ނުކުރާނެކަމަށް ބައެއް ނޫސްތަކުގައި ލިޔެފައި ހުއްޓާ ފެނުނެވެ. އަދި އަޅުގަނޑު ދެއްކި ވާހަކައިގެ މަފްހޫމަށް ބެލުމެއްނެތި ސިޔާސީ ވިސްނުމުގައި މަދު ފަރާތްތަކެއް މިފަދަ އިބާރާތްތައް ބޭނުންކޮށްފައި ވެއެވެ. އެއީ، އެފަރާތްތަކަށް ދޭހަވުމުގައި ދިމާވި މައްސަލައަކުން ވެފައިވާ ކަމެކެވެ.