ގޭބިސީތަކަށް އެންމެ ފަހުން ލިބުނު ކަރަންޓު ބިލް ބޮޑުވި ކަމަށް ބުނެ، އެކަމާ ބެހޭ ޝަކުވާތައް ހުށަހަޅަން ސްޓެލްކޯއިން ހުޅުވާލުމުން 659 ފޯނު ކޯލާއި 6،135 މެސެޖު ލިބިފައިވާ ކަމަށް އެ ކުންފުނިން މިއަދު ބުނެފިއެވެ.
އޭޕްރީލް މަހުގެ އެއްބަޔާއި މެއި މަހުގެ އެއްބައި ހިމެނޭ ކަރަންޓު ބިލް އައިއިރުގައި ބިލު ބޮޑު ކަމަށް ބުނެ ވަރަށް ގިނަ ބަޔަކު ދަނީ ސޯޝަލް މީޑީއާގައި ކަންބޮޑުވުން ފާޅުކުރަމުންނެވެ. އެކަމާ ގުޅިގެން އެ ކުންފުންޏަށް ޝަކުވާ ހުށަހަޅަން އެދުނީ މިދިޔަ އާދިއްތަ ދުވަހުއެވެ.
ސްޓެލްކޯއިން ބުނީ ކަރަންޓު ބިލްތަކާ ގުޅިގެން މިދިޔަ ދެ ދުވަސް ތެރޭ ޝަކުވާގެ ގޮތުގައި ލިބިފައި ވަނީ 659 ފޯނުކޯލު ކަމަށެވެ. އެ ހުރިހާ ކޯލަކަށް އެޓެންޑް ވެފައިވާ ކަމަށް އެ ކުންފުނިން ބުންޏެވެ. ވައިބާ، ވަޓްސްއެޕް، ޓެލެގްރާމް، ފޭސްބުކް އަދި ވެބްސައިޓް މެދުވެރިކޮށް 6135 މެސެޖު ލިބިފައިވާ ކަމަށް ވެސް އެ ކުންފުނިން ބުންޏެވެ.
ހުރިހާ ޝަކުވާއަކަށް ވެސް 24 ގަޑި އިރުތެރޭ އެޓެންޑްވުމަށް މަސައްކަތް ކުރެވެމުންދާ ކަމަށް ސްޓެލްކޯއިން ބުންޏެވެ.
ކަރަންޓު ބިލުތަކާ ގުޅިގެން ހުށަހަޅަން ބޭނުންވާ ޝަކުވާތައް އެ ކުންފުނީގެ ކަސްޓަމާ ސާވިސް ނަމްބަރު 7788438 އަށް ވަޓްސްއަޕް ނުވަތަ ޓެލެގްރާމް މެދުވެރިކޮށް ހުށަހެޅޭނެ އެވެ. އަދި [email protected] އިން އީމެއިލް މެދުވެރިކޮށް ވެސް ޝަކުވާ ހުށަހެޅޭނެ ކަމަށް އެ ކުންފުނިން ބުންޏެވެ.
ސްޓެލްކޯއިން ބުނާ ގޮތުގައި ބިލުތައް ބޮޑުވީ ހޫނު ގަދަ ދުވަސްވަރާ ދިމާވެގެން ކަމަށެވެ. ކަރަންޓް ބޭނުންކުރާ މިންވަރަށް ވުރެ އިތުރަށް އެ ކުންފުނިން ބިލްކޮށްފައި ނުވާ ކަމަށާއި ބިލް ފޮނުވުމުގެ ކުރިން ވެސް ބިލަށް އަރަމުންދާ ވަރު ބަލާލެވޭނެ ކަަމަށް އެ ކުންފުނިން ބުނެއެވެ.
