އިރާނުގެ ކުރީގެ ރައީސް އަހުމަދީނިޖާދު އެގައުމުގެ ރިޔާސީ އިންތިޚާބުގައި ވާދަކުރައްވަން ނިންމަވައިފިއެވެ.
އީރާނުގެ ކުރީގެ ރައީސް މަހްމޫދު އަހުމަދީނިޖާދު އާއި ޚިޔާތަފާތުވުން ބޮޑު އެހެން ބައެއް ބޭފުޅުން ކަމަށްވާ މެދުމިނުގެ ސިޔާސަތުތަކަށް ތާއީދުކުރާ އަލީ ލާރިޖާނީ އާއި އަލްޓްރާކޮންޒަވޭޓިވް ސައީދު ޖަލީލީ ވެސް ވަނީ އިންތިހާބުގައި ވާދަކުރައްވަން ސޮއި ހުށަހަޅުއްވާފައެވެ.
އިރާނުގެ ރިޔާސީ އިންތިޚާބު ބާއްވަނީ މިދިޔަ މަހު، ހެލިކޮޕްޓަރު ވެއްޓުމުގެ ހާދިސާއެއްގައި ރައީސް އިބްރާހިމް ރައިސީ އަވަހާރަވުމާ ގުޅިގެންނެވެ.
އިރާނުގައި 2005 ވަނަ އަހަރުން ފެށިގެން 2013 ވަނަ އަހަރާ ހަމައަށް ރައީސްކަން ކުރެއްވި އަހުމަދީނިޖާދު ވަނީ ސޮއި ހުށަހެޅުމުގެ މުއްދަތު ހަމަވުމުގެ އެއް ދުވަސް ކުރިން އާދީއްތަ ދުވަހު ދާޚިލީ ވުޒާރާގައި ކެނޑިޑޭޓެއްގެ ގޮތުގައި އޭނާގެ ނަން ރަޖިސްޓްރީކޮށްފަ އެވެ.
އިރާނުގެ ރައީސާއި ފޮރިން މިނިސްޓަރ ދަތުރު ކުރެއްވި ހެލިކޮޕްޓަރ ވެއްޓި، އިރާނުގެ ރައީސް އިބުރާހިމް ރައީސީ، 63، އަވަހާރުވެފައިވަނީ ފާއިތުވި މޭމަހުގެ 20 ވަނަ ދުވަހުއެވެ. އެހާދިސާގައި އިރާނުގެ ޚާރިޖީ ވަޒީރުވެސް ވަނީ އަވަހާރަވެފައެވެ. އިރާންގެ ގާނޫނު އަސާސީގައިވާގޮތުން އިރާނުގެ ވަގުތީ ރައީސްކަމާއި މިހާރު ހަވާލުވެވަޑައިގެންފައިވަނީ ރައީސީގެ ފުރަތަމަ ނައިބު ރައީސްގެ މަގާމުގައި ހުންނެވެި މުހައްމަދު މުޚުބާރުއެވެ.
އޭނާ ވަގުތީ ރައީސްކަމުގެ މަގާމްގައި ހުންނަވާނީ ކުރިޔަށް އޮތް 50 ދުވަހުގެ ތެރޭގައި އެގައުމުގައި އާ ރިޔާސީ އިންތިޚާބެއް ބޭއްވެންދެނެވެ. އިރާނުގެ ގާނޫނު އަސާސީގައި ވާގޮތުން ރައީސް އަވަހާރަވެއްޖެނަމަ، ރޫހާނީ ލީޑަރުގެ ރުހުމާއެކު، އެކައުމުގެ ރައީސްކަމާއި ހަވާލުވެވަޑައިގަންނަވާނީ ނާއިބު ރައީސްއެވެ. އަދި ޖެހިގެން އަންނަ 50 ދުވަހުގެ ތެރޭގައި އާ ރިޔާސީ އިންތިޚާބެއް ބާއްވަން ޖެހޭނެއެވެ.
