މިއަދު ހައްޖަށް ފުރުމަށް ވެލާނާ އިންޓަރނޭޝަނަލް އެއަޕޯޓުގައި ޗެކިން ކުރަމުންދާ ހައްޖުވެރިންނަށް އެއަރޕޯޓުގައި ހުކުރު ނަމާދު ކުރެވޭ އިންތުޒާމް ސަރުކާރުން ހަމަޖައްސާ ދީފިއެވެ.
މިއަދަކީ ހުކުރު ދުވަސްކަމަށް ވުމާއެކު ހައްޖުވެރިންގެ ޗެކިން ގަޑި ދިމާވީ ހުކުރު ވަގުތާއެވެ. އެހެންކަމުން އެއަރޕޯޓުގައި ހުރިހާ ހައްޖުވެރިން ވަނީ އެއަރޕޯޓުގައި ހުކުރު ކޮށްފައެވެ.
ރާއްޖޭގެ ހައްޖުވެރިންގެ ފުރަތަމަ ގުރޫޕުގައި މިއަދު 298 ހައްޖުވެރިން ފުރާނެއެވެ. އޭގެ ތެރޭގައި 272 ހައްޖުވެެރިންނާއި 26 އެހީތެރިން ހިމެނެއެވެ.
މިއަހަރުގެ ޙައްޖުގެ އަޅުކަމުގައި ރާއްޖެއިން 1150 ޙައްޖާޖީން ބައިވެރިވާނެއެވެ.
ހައްޖު މިޝަންއިން ބުނީ މިއަހަރުގެ ހައްޖާޖީން މައްކާއަށް ދިއުމަށް ހަމަޖެހިފައި ވަނީ 3 ފްލައިޓެއްގައި ކަމަށެވެ. އެގޮތުން ފުރަތަމަ ފްލައިޓްގައި ފުރާނީ ޖުމްލަ 298 ހައްޖާޖީންނެއެވެ.
ދެވަނަ ގްރޫޕް 353 ހައްޖާޖީންނާ އެކީ ފުުރަން ހަމަޖެހިފައި ވަނީ އަންނަ މަހުގެ 3 ގަ އެވެ. އަދި ތިން ވަނަ ގްރޫޕް 339 ހައްޖާޖީންނާ އެކީ ފުރާނީ އަންނަ މަހުގެ 7 ގަ އެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅުގެ ދަށުން ދައުލަތުގެ ހަރަދުގައި ހައްޖަށް ފޮނުވާ 1،000 މީހުންގެ ތެރެއިން މި އަހަރު ހައްޖަށް ފޮނުވުމަށް ހަމަޖެހިފައިވާ 50 ފަގީރުން ވެސް މީގެ ތެރޭގައި ހިމެނެއެވެ.
މި އަހަރު ރާއްޖެ އަށް ލިބުނީ 1،000 ހައްޖު ކޯޓާ އެވެ. މި އަހަރު ދިވެހި ހުރިހާ ހައްޖާޖީން ވެސް ހައްޖަށް ދަނީ ހައްޖު ކޯޕަރޭޝަންގެ ހަވާލުގަ އެވެ.
މިއަދު ހައްޖަށް ދާ ހައްޖުވެރިންގެ ފޮށިތައް ހަވާލުކުރުން މިހަފްތާގައި ފެށިގެން ދިޔައިރު ހައްޖަށް ފުރާ މީހުންނަށް އެއާޕޯޓްއަށް ދެވޭނެ ފަސޭހަ ގޮތެއް ހަމަޖައްސައި ދިނުމަށްޓަކައި އިސްލާމިކް މިނިސްޓްރީއިން ވަނީ އެ ފަރާތްތަކަށް ބަހުގެ ހިދުމަތް ހަމަޖައްސައިދީފައެވެ.
