ފިޝަރީޒް ކޮލެޖުގެ ދިރާސީ އަހަރުގެ ކިޔެވުން އަންނަ އޮގަސްޓް މަހު ފަށާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ޝިޔާމް ވިދާޅުވީ މަސްވެރިކަމާ ބެހޭ ތަމްރީނު ދިނުމަށް އިންސްޓިޓިއުޓެއް އުފައްދަން މަސްވެރިކަމުގެ ގާނޫނުގައި ލާޒިމްކުރާ ކަމަށާއި މަސްވެރިކަމުގެ ޕްރޮގްރާމްތައް ފެށުމަށް ރާއްޖޭގެ ގައުމީ ޔުނިވާސިޓީއާ އެކު ވެފައިވާ އެއްބަސްވުމުގެ ދަށުން ފިޝަރީޒް ކޮލެޖުގެ ކިޔެވުން މި އަހަރު ފަށާނެ ކަމަށެވެ.
"އުއްމީދަކީ އަދި ޔަގީންކަން އެބައޮތް އޮގަސްޓް މަހުގެ ތެރޭގައި ފިޝަރީޒް ކޮލެޖް ޕްރޮގްރާމާ އެކު މަސައްކަތް ފެށޭނެ ކަމަށް،" ޝިޔާމް ވިދާޅުވި އެވެ.
ފިޝަރީޒް ކޮލެޖު އުފެއްދުމަށް ފިޝަރީޒް މިނިސްޓްރީ އާއި ދިވެހިރާއްޖޭގެ ގައުމީ ޔުނިވާސިޓީއާ ދެމެދު އެމްއޯޔޫއެއްގައި ސޮއިކޮށްފައިވަނީ މިދިޔަ ޑިސެމްބަރު މަހުގެ 27 ވަނަ ދުވަހުއެވެ. އެ ކޮލެޖްގައި ކިޔަވާދޭ ކޯސްތައް ފަރުމާކުރީވެސް އެމްއެންޔޫއިންނެވެ. ފިޝަރީޒް ކޮލެޖް ގާއިމުކުރުމާއި ގުޅޭގޮތުން މިނިސްޓަރު ޝިޔާމް ވިދާޅުވީ އެ ކޮލެޖުން ފަރުމާކުރަމުންދާ ޕްރޮގްރާމްތަކުގެ ސަބަބުން ރާއްޖޭގެ މަސްވެރިކަމުގެ ފައިދާ އިތުރުވެގެންދާނެ ކަމަށާއި އުއްމީދަކީ ޕީއެޗްޑީއާ ހަމައަށް ތައުލީމު ފޯރުކޮށްދިނުން ކަމަށެވެ.
