މާލޭގެ ގެއެއްގެ ތެރޭގައި މަރުވެފައި އޮތް މީހަކު ފެނިއްޖެ

މާފަންނު ގެއެއްގެ ތެރޭގައި މަރުވެފައި އޮތް މީހަކު މިއަދު ފެނިއްޖެއެވެ.

އެމީހާ ފެނިފައި ވަނީ މ. ރަބީއުވިލާ ގޭގެ ގްރައުންޑް ފްލޯ އިންނެވެ.

ފުލުހުން ބުނީ މ. ރަބީއުވިލާ ގޭގެ ގްރައުންޑް ފްލޯގައި ފިރިހެނަކު ނިޔާވެފައި އޮތް ކަމުގެ ރިޕޯޓު 14:20 ހާއިރު ލިބިގެން ސީންގައި ފުލުހުން ހަރަކާތްތެރިވަމުންދާ ކަމަށެވެ.

މި ފިރިހެން މީހާގެ އިތުރު އެއްވެސް ތަފްސީލެއް އަދި ލިބިފައެއް ނުވެއެވެ.

މިދިޔަ އޭޕްރީލް މަހުގެ ތެރޭގައި ރަބީއުވިލާގައި އަލިފާނުގެ ހާދިސާއެއް ވެސް ހިނގިއެވެ.

މާލޭގެ ގެއެއްގެ ތެރޭގައި މީހަކު މަރުވެފައި އޮއްވައި ފެނުނުއިރު، މިދިޔަ ބުދަ ދުވަހު ހުޅުމާލޭގައި ވޭނެއްގެ ތެރޭގައި ބިދޭސީއަކު މަރުވެފައި އޮއްވައި ވަނީ ފެނިފައެވެ. އަދި މެއި 13 ވަނަ ދުވަހު ބަނޑޭރި ކޮށީގައި ހުރި ގެއެއްގެ ތެރެއިން މަރުވެފައި އޮތް ދިވެއްސަކު ވަނީ ފެނިފައެވެ.