ޕަބްލިކް ސްޕީކިންގެ ފެންވަރު ރަގަޅު ކުރުމަށްޓަކާ، ކޯޗެއްގެ އެހީގައި 6 މަސްދުވަހުގެ ކޯހެއް ފުރިހަމަކުރަމުންދާ ކަމުގައި، މި ސަރުކާރުގެ ފަތުރުވެރިކަމާބެހޭ ވަޒީރު އިބުރާހިމް ފައިސަލް ވިދާޅުވެއްޖެއެވެ.
ފަތުރުވެރިކަމާބެހޭ ވަޒީރުގެ ހައިސިއްޔަތުން ރާއްޖެއިން ބޭރުގެ ބައެއް ފޯރަމްތަކުގައި އިނގިރޭސިބަހުން ދެއްވަމުންގެންދަވާ އިންޓަރވިއުތަކަށް ގިނަބައެއްގެ ފާޑުކިއުން އަމާޒުވެފައި ވަނިކޮށް، އެ ފާޑުކިއުންތަކާ ގުޅޭގޮތުން މީޑިއާގައި ވާހަކަ ދައްކަވަމުން ފައިސަލް ވިދާޅުވީ ފާޑިކިއުންތައް ބަލައިގަންނަކަމަށާއި، ދިވެހިރާއްޖޭގެ ޓުއަރިޒަމް މިނިސްޓަރުގެ ވަކި ސްޓޭންޑަޑެއް ހުންނަންޖެހޭނެކަމަށް ދިވެހިރައްޔިތުން ބޭނުންވާނެކަން ގަބޫލުކުރާ ކަމުގައެވެ.
އެގޮތުން ކޯޗެއްގެ އެހީގައި ޕަބްލިކް ސްޕީކިންގެ ފެންވަރު ރަގަޅުކުރުމަށް 6 މަސްދުވަހުގެ ކޯހެއް ހަދަމުންދާކަމުގައި ފައިސަލް ވިދާޅުވިއެވެ.
އެބޭފުޅުން އެ ކިޔާ ފާޑުކިޔުންތައް އަޅުގަނޑު އިރާދަކުރެއްވިއްޔާ ރަނގަޅު ކުރާނަން. އަޅުގަނޑުގެ ޕަބްލިކް ސްޕީކިން ވެސް އިރާދަ ކުރެއްވިއްޔާ ކޯޗެއް ހަޔާ ކޮށްގެން އެ މަސައްކަތް ކުރަން. އަޅުގަނޑު ކުރިއަށް އޮތްތާގައި އިރާދަކުރެއްވިއްޔާ އެކަން ރަނގަޅު ކުރާނަން.. އަޅުގަޑު އެ ޕްރެކްޓިސްތައް ހަދާ، އިރާދަކުރެއްވިއްޔާ ކުރިޔަށް އޮތް 6 މަސްތެރޭ އަޅުގަޑު އެކަން ރަގަޅު ކުރާނަން.
ފައިސަލް ވިދާޅުވިއެވެ.
ރާއްޖޭގެ ފަތުރުވެރިކަމާބެހޭ ވަޒީރުގެ ހައިސިއްޔަތުން ފާއިތުވެދިޔަ ކުރު މުއްދަތެއްގައި، ބޭރުގެ ބައެއް ފޯރަމްތަކުގައި ފައިސަލް އިނގިރޭސިބަހުން ދީފައިވާ ބައެއް އިންޓަރވިއުތަކަށް ސޯޝަލް މީޑިއާގައި ބައެއް ފަރާތްތަކުގެ ފާޑުކިއުން ވަނި އަމާޒު ވެފައެވެ.
