ރައީސުލްޖުމުހުރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް، ރާއްޖޭގައިތިބި އިންޑިއާގެ ހުރިހާ ސިފައިން ފައިބައިފިއެވެ.
މިކަން އިންޑިއާގެ އެކްސްޓާނަލް އެފެއާޒު މިނިސްޓްރީގެ ތަރުޖަމާނު ރަންދީރް ޖެއިސްވާލް ބޭރުގެ މީޑިއާތަކަށް ކަށަވަރު ކޮށްދީފައެވެ. އަދި ސަރުކާރުގެ ތަރުޖަމާން ހީނާ ވަލީދުވެސްވަނީ ރާއްޖޭގެ ލޯކަލް މީޑިއާތަކަށް މިކަން ކަށަވަރު ކޮށްދީފައެވެ.
ރައީސް މުއިއްޒު ވެރިމަކާ ހަވާލުވެވަޑައިގެންނެވުމަށްފަހު އިންޑިއާއި ރާއްޖެއާ ދެމެދު ކުރިޔަށްދިޔަ ވާހަކަތަކުގައި ދެ ގައުމުންވެސް އެއްބަސްވެފައިވަނީ މާދަމާގެ (މޭމަހުގެ 10 ވަނަ ދުވަހުގެ ކުރިން) ރާއްޖޭގައި ތިބި އިންޑިއާ ސިފައިން ރާއްޖެ ދޫކޮށް ދިއުމަށެވެ. އޭގެ ބަދަލުގައި ރާއްޖޭގައި ދުއްވަމުންދާ އިންޑިއާގެ ވައިގެ އުޅަނދުތައް އޮޕަރޭޓް ކުރުމަށް އިންޑިއާގެ މަދަނީ މީހުން އައުމަށްވެސް ވަނީ ހަމަޖެހިފައެވެ. އޭގެތެރެއިން ބައެއް މީހުން މިހާރުވަނީ ރާއްޖެ އައިސްފައެވެ.
ފާއިތުވި ހަފްތާގައި ރާއްޖޭގެ ޚާރިޖީ ވުޒާރާއިން ބުނެފައިވަނީ އިންޑިއާގެ އޭވިއޭޝަން 3 ޕްލެޓްފޯމްގެ ތެރެއިން ފަހު ޕްލެޓްފޯމްގައި ތިބި ސިފައިންގެ ބަދަލުގައި ސިވިލިއަނުން މެއި މަހުގެ 10 ވަނަ ދުވަހުގެ ކުރިން ރާއްޖެ އައުމަށް ހަމަޖެހިފައިވާ ކަމަށެވެ. އަދި އެކަމަށްޓަކާ ހަމަޖައްސަންޖެހޭ ލޮޖިސްޓިކްސް ހުރިހާ އިންތިޒާމެއްވެސް ޝެޑިއުލްއާއެއްގޮތަށް ކުރިޔަށް ގެންދިއުމަށް ދެފަރާތުން އެއްބަސްވެފައިވާކަމަށްވެސް ފޮއިން މިނިސްޓްރީން ބުނެފައި ވެއެވެ.
ރާއްޖޭގައި ތިބި އިންޑިއާގެ ސިފައިން ރާއްޖެއިން ފޮނުވާލުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދެކެވެ. ވެރިކަމަށް އައުމަށް ކުރި ކެމްޕެއިނުގައި ރައީސް މުއިއްޒު ވައުދުވީ، ފުރަތަމަ ދުވަހުން ފެށިގެން ވެސް މަސައްކަތް ކުރާނީ ރާއްޖޭގައި ތިބި ސިފައިން ފޮނުވާލުމަށްކަމަށާއި އެއްބަސްވުންތައް ރިވިއު ކުރުމަށް ފަހު ގައުމުގެ މިނިވަންކަމަށް ބުރޫއަރާ ގޮތަށް ހުރި އެގްރިމަންޓުތައް ބާތިލު ކުރައްވާނެކަމަށް ރައީސް ވިދާޅުވި އެވެ.
