އެފްރިކާ، އޭޝިއާ، ކެރީބިއަން، ކެޓިން އެމެރިކާ އަދި ފެސިފިކްއަށް ނިސްބަތްވާ 58 ގައުމެއް ނިސްބަތްވާ، އަދި ދުނިޔޭގެ 1.4 ބިލިއަން މީހުން އެ ތަމްސީލު ކުރަމުންދާ ކްލައިމެޓް ވުލްނަރަބިލިޓީ ފޯރަމް (ސީވީއެފް) އެހީގައި ސްރީލަންލާގެ ދަނޑުވެރިކަމާއި ޖަންގަލިތައް ހިމާޔަތްކުރުމަށް ޚާއްސަކޮށްގެން 120 މިލިޔަން ޑޮލަރު އިންވެސްޓްކުރުމުގެ އެއްބަސްވުމެއްގައި މިއަދު ސޮއިކޮށްފި އެވެ.
މިއެއްބަސްވުމުގައި ސޮއި ކޮށްފައިވަނީ ސީވީއެފްގެ ސެކެޓްރީ ޖެނެރަލް މުހައްމަދު ނަޝީދުއާއި، ސްރީލަންކާގެ ރައީސް ރަނިލް ވިކްރަމަސިންހަ ގެ ސްޕެޝަލް އެޑްވައިޒަރު ރުވާން ވިޖެވަރުދަނާއާއި ނަޓީވާ ކެޕިޓަލްގެ ފަރާތުން ކާލޯސް ގޯމޭޒް އެވެ.
މިއަދު އެއްބަސްވުމުގެ ދަށުން ލަންކާގެ ދަނޑުވެރިކަމާއި ޖަންގަލިތައް ހިމާޔަތް ކުރުމަށް އިންވެސްޓްކުރާނީ ޕޯޗުގަލްގެ ނަޓީވާ ކެޕިޓަލް ނަމަކަށް ކިޔާ ކުންފުންޏަކުންނެވެ. މިއީ ސްރީލަންކާގެ ކްލައިމެޓް ޕްރޮސްޕެރިޓީ ޕްލޭންގެ ދަށުން ކުރާ ފުރަތަމަ އިންވެސްޓްމަންޓެވެ.
މި އެއްބަސްވުމުގައި ސޮއި ކުރެއްވުމަށްފަހު ނަޝީދު ވިދާޅުވެފައިވަނީ، ސީވީއެފްއިން ބާރުއަޅަނީ ކްލައިމެޓް ޕްރޮސްޕަރިޓީ ޕްލޭންތައް މެމްބަރު ގައުމުތަކުން އެކުލަވާލުމަށް ކަމުގައެވެ. އަދި އެ ޕްލޭންތަކުން ޖީޑީޕީއާއި ވަޒީފާތައްވެސް އިތުރުކޮށްދީ އަދި އިންފްލޭޝަންވެސް ދަށް ކުރެވޭނެ ކަމުގައެވެ. އެކަންކަން ތިމާވެއްޓަށް ގެއްލުން ނުދީވެސް ކުރެވޭނެކަމަށް ނަޝީދު ވިދާޅުވިއެވެ.
"ދަ ސީވިއެފް"ގެ މިދައުރުގެ ރިޔާސަތު ބަލަހައްޓަވަނީ ގާނާއިންނެވެ.
"ދަ ކްލައިމެޓް ވަލްނަރަބްލް ފޯރަމް" (ދަ ސީވީއެފް) ޖަމިއްޔާއަކީ ތިމާވެށީގެ ގޮންޖެހުންތަކާއި ކުރިމަތިލާން ޖެހޭގައުމުތައް އެކުވެގެން އުފައްދާފައިވާ ޖަމިއްޔާއެކެވެ.
އެޖަމިއްޔާއަށް މިހާރު، އެފްރިކާ، އޭޝިއާ، ކެރީބިއަން، ކެޓިން އެމެރިކާ އަދި ފެސިފިކްއަށް ނިސްބަތްވާ 58 ގައުމެއް ނިސްބަތް ވެއެވެ. އަދި ދުނިޔޭގެ 1.4 ބިލިއަން މީހުން އެ ޖަމިއްޔާއިން ތަމްސީލު ކުރެއެވެ.
