ގެދޮރުވެރިޔާ ސްކީމްގެ ދަށުން އަޅަމުންދާ 4،000 ފްލެޓް ލިބޭ މީހުން މިދިޔަ ސަރުކާރުން ހޮވައި އެކުލަވާލާފައިވާ ލިސްޓަށް އުނި އިތުރެއް ނުގެނެސް ފްލެޓް ލިބޭ މީހުންނާ ފްލެޓްތައް ހަވާލުކުރުމަށް ރައްޔިތުންގެ މަޖިލިހުން ފާސް ކޮށްފިއެވެ.
މަޖިލިހުގެ މި ދައުރު ނިމެން އެންމެ ހަފްތާއަކަށް ވެފައިވަނިކޮށް، ކުރީ ސަރުކާރުން އެކުލަވާލި ލިސްޓާއި އެއްގޮތަށް ފްލެޓް ހަވާލުކުރުމަށް މިއަދުގެ މަޖިލިސް ޖަލްސާއިން ފާސްކުރީ ޖަލްސާގައި ބައިވެރިވި 29 މެންބަރުންގެ ވޯޓުންނެވެ. ދެކޮޅަށް އެއްވެސް މެންބަރަކު ވޯޓު ދީފައެއް ނެތެވެ.
މިއަދުގެ މަޖިލިސް ޖަލްސާއިން ފާސްކޮށްފައިވަނީ ގެދޮރުވެރިޔާ ސްކީމްގެ ދަށުން ދޫކުރުމަށް ކަނޑައަޅާފައިވާ ފުލެޓުތަކާ ގުޅިގެން އާންމުންގެ ފަރާތުން ހުށަހަޅާފައިވާ މައްސަލަ ދިރާސާކޮށް މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ނެރުނު ރިޕޯޓަށް މަޖިލީހުގައި ވޯޓަށް އަހައިގެންނެވެ.
އެ ރިޕޯޓުގައި ކޮމިޓީން ވަނީ ގެދޮރުވެރިޔާ ސްކީމްގެ ދަށުން ދޫކުރުމަށް ކަނޑައަޅާފައިވާ ފުލެޓުތައް ހަވާލުކުރުން ލަސްވެފައިވާކަމަށާ އޭގެ ސަބަބުން އާއްމުންނާއި ފުލެޓް ލިބުނު ފަރާތް ތަކުގެ ކަންބޮޑުވުން އޮތްކަން ފާހަގަކޮށްފައެވެ.
މިއަދުގެ ޖަލްސާއިން 4000 ފްލެޓް ކުރީ ސަރުކާރުގެ ލިސްޓާ އެއްގޮތަށް ހަވާލުކުރުމަށް ފާސްކޮށްފައިވާއިރު، ހައުސިން މިނިސްޓަރ ޑރ. ހައިދަރު މީގެ 3 ހަފްތާކުރިން ވިދާޅުވެފައިވަނީ، ގެދޮރުވެރިޔާ ސްކީމްގެ ދަށުން އަޅަމުންދާ 4،000 ފްލެޓް ލިބޭ މީހުން މިދިޔަ ސަރުކާރުން ހޮވައި އެކުލަވާލާފައިވަނީ އެންމެ ރަނގަޅަށް ނޫން ކަމަށާއި، އެ ފްލެޓްތަކަށް ޝަރުތުހަމަ ނުވެ ފްލެޓް ނުލިބޭ މީހުންނަށް އެހެން މަޝްރޫއުތަކުން ފުރުސަތު ހޯދައިދޭނެ ކަމަށެވެ.
މިނިސްޓަރ މިހެން ވިދާޅުވީ، ހިޔާ ޓަވަރުތަކުގައި އިތުރު ލިފްޓް ހަރުކުރަން ފެށުމުގެ ގޮތުން ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ހައިދަރު ވިދާޅުވީ، ފްލެޓްތައް ދިނުމުގައި އަމަލުކުރާ އުސޫލުތަކެއް މިދިޔަ ސަރުކާރުން އެކުލަވާލައިފައިވީ ނަމަވެސް، އެކުލަވާލެވިފައިވަނީ އެންމެ ރަނގަޅަށް ނޫން ކަމަށާއި، އެ ލިސްޓުތައް އަލުން މުތާލިއާ ކުރަން ޖެހޭ ކަމަށެވެ.
މިހާރު އިމާރާތް ކުރަމުންދާ 4000 ފްލެޓްގައި ދިރިއުޅޭނެ ރައްޔިތުން ހޮވުމަށް ކުރީ ސަރުކާރުން ނިންމަވާފައިވާ ލިސްޓުތަކަށް އަޅުގަނޑުމެން އެބަ ޖެހޭ ކޮންމެވެސް ވަރެއްގެ މުތާލިއާތަކެއްކޮށް، އެ ލިސްޓުތަކަކީ ކުރީ ސަރުކާރުން ކަނޑައަޅާފައިވާ ޝަރުތުތަކަށް ފެތޭ ބައެއްތޯ ކަނޑައަޅަން. ކުރީ ސަރުކާރުން ޝަރުތުތަކާއި، އުސޫލުތަކާއި ކަނޑައަޅާފަ އޮތީ. އެހެން ނަމަވެސް، އެނގިވަޑައިގަންނަވާނެ ފަދައިން މި މަސައްކަތް ކުރެވިފައިވަނީ އެންމެ ރަނގަޅަކަށް ނޫން.
މިނިސްޓަރ ވިދާޅިވިއެވެ.
ނިމިދިޔަ ސަރުކާރުން ދޫކުރި 4000 ފްލެޓް ހަވާލު ކުރުން އޭސީސީ އިން ހުއްޓުވާފައި ވަނީ ގެދޮރު ވެރިޔާ ސްކީމުގެ ދަށުން ފްލެޓް ލިބޭ މީހުންގެ ލިސްޓު އާންމުކުރުމާއެކު ބައެއް ފަރާތްތަކަށް އުސޫލުން ބޭރުން ޕޮއިންޓް ދީފައިވާ ކަމަށް ބުނާ މައްސަލަތަކާ ގުޅިގެންނެވެ.
