ރާއްޖޭގައި ތަރައްގީގެ އިތުރު މަޝްރޫއުތައް ހިންގުމަށް އަބޫދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ)ގެ އެހީ ހޯދުމަށް މަޝްވަރާކޮށްފިއެވެ.
ފޮރިން މިނިސްޓަރު މޫސާ ޒަމީރު ޔޫއޭއީ އަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި އެ ފަންޑުގެ ޑިރެކްޓަރު ޖެނެރަލް ސައިފް އަލް ސުވައިދޫ އާ އިއްޔެ ވަނީ ބައްދަލު ކުރައްވައިފައެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ، މި ބައްދަލުކުރެއްވުމުގައި މިނިސްޓަރު ޒަމީރު ވަނީ މަޝްރޫއުތައް ހިންގުމަށް އަބޫދާބީ ފަންޑުން ދެމުންދާ އެހީ ފާހަގަ ކުރައްވައި ކުރިއަށް ހުރި މަޝްރޫއުތަކާ ބެހޭ ޕްރޮޕޯސަލްތަކާ މެދުގައި މަޝްވަރާ ކުރައްވާފައި ކަމަށެވެ.
ޒަމީރުގެ ވާހަކައިގައި ވެލާނާ އިންޓަނޭޝަނަލް އެއާޕޯޓު (ވީއައިއޭ) އާއި ނ. މާފަރު އިންޓަނޭޝަނަލް އެއާޕޯޓު ތަރައްގީ ކުރުމަށް އަބޫދާބީ ފަންޑުން ފޯރުކޮށްދިން އެހީތެރިކަން ފާހަގަ ކުރެއްވިއެވެ. އަދި އެކަމުގެ ސަބަބުން ފަތުރުވެރިން އަންނަ މިންވަރު އިތުރުވެ، ރާއްޖޭގެ އިގްތިސާދު އިތުރަށް ވަރުގަދަވާނެ ކަމަށް އެ ބަޔާނުގައިވެއެވެ.
ޒަމީރު ވަނީ ރާއްޖެއާއި ޔޫއޭއީއާއި ދެމެދު އޮތް ޒަމާންވީ ގާތްގުޅުމުގެ މައްޗަށް އަލިއަޅުވާލައްވައި، އެގައުމުގެ ސަރުކާރުން ރާއްޖެއާއި ދޭތެރޭ ބާއްވާ ގާތްކަމަށް ޝުކުރު އަދާ ކުރައްވައިފައެވެ.
