މުދަލުގެ އަގު ފުލިގެން ދިޔަ ނުދިނުމަށް ކުރެވޭ މަސައްކަތްތަކުގައި ސަރުކާރުގެ އެއްބާރުލުން ލިބެންޖެހޭ ކަމުގައި މޯލްޑިވްސް ޓްރޭޑް އެސޯސިއޭޝަންގެ ނާއިބު ރައީސް އާމިނަތު މުޒުނީނާ ވިދާޅުވެއްޖެއެވެ.

މުޒުނީނާ މިހެން ވިދާޅުވީ މިއަދު ފާހަގަ ކުރެވެމުންދާ މަސައްކަތްތެރިންގެ ދުވަހުގެ މުޒާސަބަތުގައި ޓްރޭޑް ޔޫނިއަންތައް ގުޅިގެން ބޭއްވި ރެލީގައި ވާހަކަ ދައްކަވަމުންނެވެ.

މުޒުނީނާގެ ވާހަކާގައި ވިދާޅުވީ ވިޔަފާރިވެރިންނަކީ މަސައްކަތްތެރިންގެ ތެރޭގައި ހިމެނޭ މުހިންމު ބައެއް ކަމަށާއި އެހެންކަމުން ވިޔަފާރަވެރިންނަށް އެންމެ އެކަށީގެންވާ މާހައުލެއް ތަނަވަސް ކޮށްދޭންޖެހޭ ކަމުގައެވެ. އެގޮތުން ބޯޓުތަކުގެ އޭޖެންޓުން އަތުން އެމްޕިއެލްއިން ޑޮލަރުން ފީނަގަން މިހާރު ފަށާފައިވުމަކީ، މުދަލުގެ އަގު އުފުލެން މެދުވެރިވެފައިވާ ސަބަބެއްކަން ފާހަގަ ކުރައްވަމުން މުޒުނީނާ ވިދާޅުވީ މުދަލުގެ އަގު އުފުލިގެން ދިއުމުން މަސައްކަތްތެރިންނަށް ކުރިމަތިވާ ގޮންޖެހުންތައް ކުޑަކުރުމަށް ސަރުކާރުގެ އެއްބާރުލުން ބޭނުންވާ ކަމުގައެވެ.

މިއަދު 3:45ގައި ރަސްފަންނުން ފެށުނު ރެލީ މަޖީދީމަގުން ހިނގާލާފަ ގޮސް ނިންމާލީ އާރޓިފިޝަލް ބީޗުންނެވެ. އާރޓިފިޝަލް ބީޗުގައި މި ރެލީގައި ބައިވެރިވި އިސް ފަރާތްތަކުންވަނީ ވާހަކަ ދައްކާފައެވެ.

މިއަދުގެ ރެލީގައިވަނީ މަސައްކަތް ކުރަންޖެހޭ ވަގުތު 6 ގަޑިއިރަށް ބަދަލު ކޮށްދިނުމަށާއި، ރިސޯޓު މުވައްޒަފުންގެ ތުބުޅި ބެހެއްޓޭގޮތް ހަދާ ދިނުމަށާއި، މަސައްކަތްތެރިންގެ މެދުގައި އޮތް ތަފާތުކުރުން ނައްތާލުމަށް އަޑު އުފުލާފައެވެ. އޭގެ އިތުރުން ބިދޭސީންވެސް މިނިމަމް ވޭޖުގައި ހިމަނާ ބިދޭސީ މަސައްކަތްތެރިންގެ މެދުގައި އޮތް ތަފާތުކުރުންތައްވެސް ނައްތާލުމަށްވަނީ މިއަދުގެ ރެލީގައި އަޑު އުފުލާފައެވެ. އަދި އޭގެއިތުރުން ސިވިލްސާވިސް މުވައްޒަފުންނަށް ކަނޑައަޅާފައޮތް އޯޓީ ސީލިންވެސް ނައްތާލުމަށްވެސް ރެލީގައި ގޮވާލާފައި ވެއެވެ.