މި ސަރުކާރުން ދީފައިވާ ސިޔާސީ މަގާމްތަކުގެ އަދަދާއި ގުޅެގޮތުން ވަރަށް ގިނަ ގޮތްގޮތަށް ވާހަކަ ދައްކާކަމަށާއި، މިހާތަނަށް ދީފައިވާ ސިޔާސީ މަގާމްތަކުގެ އަސްލު އަދަދު ވަރަށް އަވަހަށް ހާމަކުރާނެ ކަމުގައި ސަރުކާރުގެ ތަރުޖަމާން ހީނާ ވަލީދު ވިދާޅުވެއްޖެއެވެ.
ސަރުކާރުން މިހާރު ދެމުންދާ ސިޔާސީ މަގާމްތަކުގެ ތަފްސީލު ރައީސް އޮފީހުގެ ވެބްސައިޓުން މިހާރު ފެންނަން ނުހުންނާތީ އެކަމާއި ގުޅޭގޮތުން ނޫސްވެރިއަކު ކުރި ސުވާލުތަކަށް ޖަވާބު ދެމުން ހީނާ ވިދާޅުވީ ސިޔާސީ މަގާމްތައް ދިނުމުގައި އަމަލުކުރާންޖެހޭ އުސޫލުތަކެއް ހުންނަކަމަށާއި، ރައީސް އޮފީހުގެ ވެބްސައިޓަށްވެސް މައުލޫމާތު ލަމުންދަނީ އެ އުސޫލުތަކާ އެއްގޮތްވާ ގޮތުގެމަތިން ކަމުގައެވެ.
ސިޔާސީ މަގާމުތަކުގެ ވާހަކަ ވަރަށް ގިނަ ގޮތްގޮތަށް ވަރަށް ގިނަ ބަޔަކު އެބަ ދައްކާ. ދެން މީގައި އިރާދަކުރެއްވިއްޔާ އަޅުގަނޑު ވަރަށް އަވަހަށް ސިޔާސީ މަގާމުތަކުގެ އެކްޒެކްޓް ފިގާ ތިބޭފުޅުންނާ ހަމައަށް ފޯރުކޮށްދޭނަން.
ހީނާ ވިދާޅުވިއެވެ.
ވެރިކަމާ ހަވާލުވުމަށްފަހު ރައީސް މުއިއްޒު ވިދާޅުވީ ސިޔާސީ މަގާމްތަކުގެ އަދަދު 700 އަށްވުރެ އިތުރު ވެގެން ނުދާނެކަމުގައެވެ. އެހެންނަމަވެސް އިދިކޮޅު ފަރާތްތަކުން މިހާރު ބުނަމުން ދަނީ ފާއިތުވި މަޖިލިސް އިންތިޚާބުގައި ދީފައިވާ ވަޒީފާތަކާއެކު، މިސަރުކާރުގެ ސިޔާސީ މަގާމްތަކުގެ އަދަދު މިހާރު 1،500 އިން މައްޗަށް ގޮސްފައިވާ ކަމުގައެވެ.
