ބާސެލޯނާ އެއްވަރުވެ އިތުރު ހުރަސްތަކެއް

ސްޕެނިޝް ލަލީގާގައި ބާސެލޯނާ ކުޅުނު މެޗު އެއްވަރުވެ ލީގުގައި ކުރިޔަށްޖެހިލަން ލިބުނު ފުރުސަތުގައި އިތުރު ހުރަސްތަކެއް ދިމާވެއްޖެއެވެ.

އަމިއްލަ ދަނޑުގައި ކުޅެ ބާސެލޯނާ އެއްވަރުވީ 2-2 ލަނޑުންނެވެ. ރޭގައި މެޗު ފުރަތަމަ ލަނޑުޖަހާ ކުރިހޯދީ ވެލެންސިޔާއިންނެވެ. ބާސެލޯނާއިން ނަތީޖާ ހަމަހަމަކުރީ ލިބުނު ޕެނެލްޓީ މެސީއަށް ކާމިޔާބު ނުވުމުން ބޯޅަ ވެލެންސިޔާ ކުޅުންތެރިންނަށް ދިފާއު ނުކުރެވެނީސް ދެވަނަ ފަހަރު ގޯލްތެރެއަށް ބޯޅަފޮނުވާލައިގެންނެވެ. މި ޕެނެލްޓީ ބާސެލޯނާއަށް ދިނުމުގެ ކުރިން ވެލެންސިޔާގެ ޖޯސް ލުއިސް ގަޔާ އަށް ވަނީ އޭރިޔާ ތެރެއިން ކުރި ފައުލަކަށް ރަތް ކާޑުދައްކާފައެވެ.

ފަހުން ވީއޭއާރް ބެލުމަށްފަހު ޕެނެލްޓީ ދިންނަމަވެސް ރަތްކާޑުގެ ނިންމުން ވަނީ ރީނދޫ ކާޑަކަށް ބަދަލުކޮއްފައެވެ. މި ލަނޑާއެކު އެއްކުލަބަކަށް އެންމެ ގިނަލަނޑުޖަހައި ރެކޯޑް ހަދައިފަވާ ޕެލޭގެ ރެކޯޑާ މެސީ ވަނީ ހަމަކޮށްފައެވެ. މެސީ ވަނީ ބާސެލޯނާއަށް މިހާތަނަށް 643 ލަނޑު ކާމިޔާބުކޮށްފައެވެ. އެއްކުލަބަ މެޗުގައި ދެވަނަހާފްގައި ބާސެލޯނާއިން ރޮނާލްޑް އަރައުޖޯ ލީޑް ނަގައި ދިން ނަމަވެސް މެކްސީ ގޯމޭޒް ވަނީ ލެނޑެއްޖަހައި ނަތީޖާ ހަމަހަމަކޮށްފައެވެ.

މިމެޗު އެއްވަރުވުމުން ބާސެލޯނާ އޮތީ 13 މެޗުން ލިބުނު 21 ޕޮއިންޓާއެކު ތާވަލުގެ ފަސްވަނައިގައެވެ.