ކުރިޔަށް އޮތް މަޖިލިސް އިންތިޚާބުގައި ގުރައިދޫ ދާއިރާއަށް ވާދަކުރަމުންދާ ޑިމޮކްރެޓްސްގެ ކެނޑިޑޭޓް އެދާއިރާގެ ސަރުކާރު ކެނޑިޑޭޓަށް ރާއީދު ކުރަން ނިންމައިފިއެވެ.
ގުރައިދޫ ދާއިރާއަށް ވާދަކުރަމުންދާ ޑިމޮކްރެޓްސްގެ ކެނޑިޑޭޓަކީ ލީލާ އިބްރާހިމް މަނިކުއެވެ. އޭނާ ތާއީދުކުރަން ނިންމާފައިވަނީ އެދާއިރާއަށް ޕީއެންސީގެ ޓިކެޓްގައި ވާދަކުރަމުންދާ ހަނާން މުހައްމަދު ރަޝީދުއަަށެވެ.
ލީލާ ހަންނާނަށް ތާއީދުކުރާކަން ހާމަ ކޮށްފައިވަނީ ރޭ ބޭއްވި ހަންނާންގެ ކެމްޕޭން ޖަލްސާގައެވެ. އެ ޖަލްސާގައި ހޯމް މިނިސްޓަރ އަލީ އިހުސާންވެސް ބައިވެރިވެވަޑައިގެންނެވިއެވެ.
މި ޖަލްސާގައި އިހުސާން ވިދާޅުވީ އެދާއިރާގެ ޑިމޮކްރެޓްސްގެ ކެނޑިޑޭޓް ޕީއެންސީގެ ކެނޑިޑޭޓަށް ތާއީދުކުރަން ނިންމުމަކީ ދާއިރާއަށާއި އަދި ގައުމަށްވެސް އެންމެ ރަގަޅު ގޮތް ކަމުގައި ވިދާޅުވިއެވެ. އަދި އޭނާ ވިދާޅުވީ މި އިންތިޚާބުގައި ޑިމޮކްރެޓްސް އޮތީ ރައީސް މުއިއްޒުއާއެކު ކަމަށެވެ.
ގުރައިދޫ ދާއިރާއަށް ދެން ވާދަކުރަނީ އަމިއްލަ ކެނޑިޑޭޓްއެކެވެ.
މިހާތަނަށް އައިއިރު ޑިމޮކްރެޓްސް 2 ކެނޑިޑޭޓަކު ވަނީ ސަރުކާރު ކެނޑިޑޭޓަށް ތާއީދުކުރަން ނިންމާފައެވެ. ޑިމޮކްރެޓްސްގެ ކެނޑިޑޭޓުންނަށް ތާއީދު ހޯދުމަށް އެ ޕާޓީގެ ބާނީ ކުރީގެ ރައީސް މުހައްމަދު ނަޝީދު މާލެ ވަޑައިގެންނެވުމަށް ވަނީ ހަމަޖެހިފައެވެ.
